Ara, caldria saupre los efieches juridics del teste (s'es votat fin finala : lo congrès aura la darrièra paraula). Es probable que n’ajan pas cap. Fa un brieu que lo poder se servis de la lei non pas per cambiar la vida, mas puslèu per far de comunicacion, e lo tipe que fa president a l’ora d’ara es un especialista. Ça que la, lo fach que lo teste foguèsse estat votat prova que la causa de las lengas fa camin dins la societat.
De tot biais, solide que degun pòt pas esperar que lo salvament de l’occitan venga de l’Estat francès ! Ont ne’n seria lo catalan se i avia pas agut la Generalitat ? Per çò qu'es del nòstre cas, encara caldria que las regions ajan una vertadiera volontat politica. A aquel prepaus, Alain Rousset président de la Region Aquitania, declarèt dins la Setmana del 15 de mai «Las regions son prestas, amb d’autras collectivitats, a crear un conselh nacional e regional de las lengas de França per dispausar d’un lòc partenarial, per debatre d’aquelas questions, çò diguèt. La jòga es pas mai la de l’identitat nacionala mas lo de l’acabament de la descentralizacion. Lo blocatge jacobin est dins nòstre pais un fait cultural ligat a de paurs. Es çò meteis per las lengas regionalas». Manca que las regions ajan vertadierament de poder, e aquò, i a pas que l'Estat que o pòt cambiar : tornam a la debuta. Verem ben...