Noms de comunas

Vos presenti mon siti sus la toponimia occitana : www.geocities.com/toponimiaoccitana/index.html
Se coneissètz deus noms que li son pas, faguetz-me signe ! Tanben per la senhalizacion en occitan...

wow rede bèth aqueth siti, èi descóbert que dens lo Gers coneishem la senhalisacion en lenga noste, qu'avèm ua comuna dab un panèu en occitan

Adiu, coneissia lo site mas coneissia pas l'autor, benvengut 'quì.
Comencei (i a 2 ans) una mapa d'Occitània a la comuna prèp, quò dèut èsser un brave trabelh per las rechampar totas.
Picas tot a la man ò as una basa de donadas ?

Conneissia ton site, qu'es plan bien fach. En Nauta Viena, n'i a 'na vila de mai qu'a botat un paneu en occitan : Sent Jan Ligora. Mas, nonmas a 'n'entrada. N'i a tanben Sent Junian qu'a daus paneus toristics bilingues (frances-occitan). E n'i a tanben Beumont (Beaumont du Lac) qu'a son nom en occitan a l'entrada. Mas dins 'na grafia merdosa (qu'es escrich biaumoun).

laBèstiadelasBartasalas a écrit:
Se coneissètz deus noms que li son pas

dens lo "Gers" i a Sauboèras, un vilatge qu'estóc i a quauques annadas un rendetz-vos deus "contaires de Gasconha"...

As pres contacte emb los topoinimistas reconeguts de ton parçan o ben d'alhors ?

Pòs apondre tanben lo vialtge d'Aigalieras dins Boca-de-Ròse qu'a sei placas d'intrada en occitan. Lo Pòrt de Boc tanben.
Assajarai de ti prendre quauquei fòtos quora mi n'anarai espacejar d'aqueu caire, que casi totei lei comunas a levat de Marselha an sei placas en occitan aicita.

De precisar tanben que la Sanha de Mar (83) a lei placas d'intradas en Francés, e occitan escrich dins lei doeis grafias.

Una causa tanben, n'aprofiechi aquesto subjecte fòrça interressant per renar còntra lo Conseu Generau dau 66 qu'aguèt l'idèia bèla de far de senhalizacien bilingüa mai soncament per la part catalana. Fa que lei vilatges occitans an doei placas parier coma lei catalans mai lei doei en francés.

E lei plan de cuco !

Einucent a écrit:Picas tot a la man ò as una basa de donadas ?

A la man (excel), e puèi copiar pagina per pagina dins Geocities. T'asseguri que m'a calgut una bèla pausa per zo far :-)

maime a écrit:En Nauta Viena, n'i a 'na vila de mai qu'a botat un paneu en occitan : Sent Jan Ligora. ... E n'i a tanben Beumont (Beaumont du Lac) qu'a son nom en occitan a l'entrada. Mas dins 'na grafia merdosa (qu'es escrich biaumoun).

Per Sent Jan Ligora zo descrubiguèri recentament, i a tanben Chasteuchervic : http://assisasperloccitanenlemosin.hautetfort.com/album/sinhalizacion_bilinga_en_lemosin/slideshow.html
Mes per Biaumont sabiái pas, mercé. Prendrai de fòtos lo còp que ven que passarai en Lemosin.

Sòfia a écrit:dens lo "Gers" i a Sauboèras

Mercé, mes li boti mas lus noms de comunas... Sabi que l'IEO vòl crear una basa toponimica completa.

Danís a écrit:As pres contacte emb los topoinimistas reconeguts de ton parçan o ben d'alhors ?

Pel siti ai pro de fonts e pro d'experiéncia (cresi). Mes per l'estudi de tota la toponimia del canton de Doma que sèi a far, ai pres contacte emb lo Ives Lavalada, qu'es un pauc mon 'mèstre' en toponimia, per çò que m'ajudèt desjà dins lo temps que fasiái ma tèsi sus la toponimia de tres comunas.

Matieu C. a écrit:Assajarai de ti prendre quauquei fòtos quora mi n'anarai espacejar d'aqueu caire,...

Una causa tanben, n'aprofiechi aquesto subjecte fòrça interressant per renar còntra lo Conseu Generau dau 66 qu'aguèt l'idèia bèla de far de senhalizacien bilingüa mai soncament per la part catalana.

Mercé, quò m'ajudariá bravament ! Ai fach qualquas viradas en Lengadòc e Gasconha per prene de las fòtos, mes ara ai pus tròp lo temps, manca pel Peirigòrd e alentorns.

Òc, dins lus Pirenèus Orientals an degut 'aublidar' lus cantons occitans.

laBèstiadelasBartasalas a écrit:

Einucent a écrit:Picas tot a la man ò as una basa de donadas ?

A la man (excel), e puèi copiar pagina per pagina dins Geocities. T'asseguri que m'a calgut una bèla pausa per zo far :-)

Ben justament ... emb de 'na basa de donadas de podrias associar a las comunas totas las informacions de ton tablèu Xcell, directament sul servidor qu'auberja ton site, quò permet las mesas a jorn en direct. Aprèp, segon coma te voles las presentar, te podès destriar per lo còde postal, ò per un mot clau tematic en paralèl de la classificacion administrativa.
Los imatges tamben, en quauques clics te podès indicar quina(s) fòtos corresponden a la comuna e las mostrar a tos vesitaires, crese que se pòt quitament situir sus una mapa.

Malaürosament li coneissi res a las basas de donadas. De mai, sabi pas se Geocities permetriá de trabalhar aital. S'as enveja de t'i botar... :-)

laBèstiadelasBartasalas a écrit:Malaürosament li coneissi res a las basas de donadas. De mai, sabi pas se Geocities permetriá de trabalhar aital. S'as enveja de t'i botar... :-)

Quora coneguei ton site, me suei fach las reflexion que te disia dins los posts de davant, vertat que Geocities ò permet pas, free per contre oc-es, e sens la frame de pub.

Per dire franc, me sadolava de trobar regularament de las paginas perso que l'una era "l'occitan qu'es aquò" ente se trobava tots los còps 'na mapa differenta, mai purida que la de davant amb suvent las vila ortografiadas d'un biais different d'un còp a l'autre.
Allera qu'era mai simple de prenèr ton trabelh coma referença.

Si ben m'interessa, d'enguerras 'na pista de segre, qu'es tarrible quèu forum !!
Promete pas per aura per contra

Quauques arremarcas a perpaus de las comunas biarnesas e de las toas causidas normalizadoras :

- Aast : Ast.
Las duas a que son primordiaus entà marcar la nasalizacion (caduda de la n : Anast, prenom medievau).
- Arancou : Arranco
L'etimon qu'ei lo basco Arangoien donc Arancon

- Auterrive : Auta-Riba
Arriba qu'ei un nom comun : Auta Arriba>Autarriba

- Bernadets : Vernadètz
Grosclaude que s'ei trompat : qu'ei vern+ada+ellum (au plurau : -èths)
Vernadèths

- Came : Came
L'étimon qu'ei lo basco Akamarre accentuat sus l'antepenultima
(A)kàmarre>càmar>càmer (vocalisme atòne landés). E com la r ne's prononcia pas.

- Haut-de-Bosdarros : Lo Shapelot
Que's ditz lo "Tchapelot" donc "Lo Chapelot"

- Lespielle : L'Espièla
Grosclaude que s'ei trompat : qu'ei Lesvila - la villa suu Les, un arriu - Lesvila>Lesviela>Lespiela

Quauques comunas lanusquetas :

- Artassenx : Artassens
L'etimon qu'ei lo basco-aquitan Artatzun (lòc on i a pins) : -nx que traduseish la prononciacion velara de la n finau en gascon (~eng/engs).

- Biarrotte : Viarròta
Fénié que perpausa Vielòta>Vieròta "com villa nova e balha biarnave"
Mes Biarrotte qu'ei tostemps escriut dab duas r dens los textes medievaus. L'étimon n'ei pas possible. Probablament basco-aquitan.

- Hastingues : Hastingues
Hastingas tot simplament.

Compliments en tot cap !

Poey de a écrit:Quauques arremarcas a perpaus de las comunas biarnesas e de las toas causidas normalizadoras

Mercé mai, tot aquò me sembla de las remarcas d'un especialista, o pas ? :-)

- Aast : d'acòrdi. Mes quò vòl dire que Aas pòt ben s'escriure As (sans nasalizacion) ?

- Arancon : non. Escrivèm casse, òme, fraisse e pas càssen, òmen, fràissen, donc per io lo -n mut après vocala posttonica es pas necessari pels toponims. De mai, l'escrivi emb -rr- per respectar la prononciacion donada per Fénié.

- Autarriba : òc, devi adaptar ma grafia a las preconisacions de l'IEO (sèi pas totjorn d'acòrdi, mes que vòles...)

- Vernadèths : bien interessant

- Càmer : benlèu. Ara cal escriure cese o céser segon l'IEO ?

- Lo Shapelòt. Grosclaude ditz que la prononciacion es "chapelot", s'es trompat ?

- Lespiela : logic, mes caliá li pensar ! -ièla o -iela ? E poiriam pas escriure Lesviela o Lesvièla ? Ai constatat que lo b- es sovent assimilat en p- (le Péparai a Doma es en realitat lo Puèg Baret. Le Pech Pourel a Castèlnau es lo Puèg Borèl,...)

- Artassens : qué perpauses coma grafia ? Cal ben representar lo -s final...

- Biarròta : d'acòrdi.

- Hastingas tot simplament. Perqué ? Es pas un fòrma feminina...

As de remarcas per d'autres noms de comunas dins los diccionaris de Grosclaude o Fénié (que citi pas, per çò que me semblon corrèctes) ?

Adieu, e òsca per ton site que conoissiáu ja un pauc.
As per amira de donar un escapolon de la toponimia occitana de cada departament? Fonciones tre un nombre minimum d'estatjants per comuna?

Siáu anat agachar çò que trobères per lo departament de Var, ai vist que donaves per info tocant Frejús (qu'as ben ortografiat coma 'quò davau) l'ortografia de l'IEO83 qu'es Frèjus*... Sai pas coma faguèron son enquista mai la pòs levar que l'accentuacien es en plen faussa, si ditz ben [fRe'jy].
Mi demandi meme, e aquí desvii un pauc, se la S finala es justificada estent que vèn de Forum Julii, e que se trobam d'escrichs ancians que li es marcat Frejus, trobam tanben Frejul. La S s'ause soncament en francés, e lo gentilici es Frejulenc...

Ai emb aquò clicat dins "fòtos de la senhalisacion en occitan", qu'au dintre dones de chifras un pauc pessimistas!
"Al mens 9 comunas an pausat de placas en occitan a l'entrada de la localitat (= 5,9% de las 153 comunas del departament)

Frejús

La Gàrdia

"Ginasservis"

Ieras

Olieulas

Rians

La Ròcabrussana

Sant Rafèu

La Sènha " (En occitan si ditz La Sanha, Renat Merle ne ditz: * La Sanha : lo nom de la vila vèn de la sanha e dei canas que clafissián lei paluns *)


Se foguèt pas fach deuriás bessai contactar lo Conseu Generau (au pieger lei comunas), que ti podriá adralhar emb aquò subre lei comunas qu'an son pichin panèu occitan a l'intrada, que n'i a ben mai qu'aquò.

A la lèsta dins lo Var Est que mi vènon de tèsta:
Leis adrets de l'Esterèu, Ròcabruna (carrieras bilinguas crèsi), la Bovariá, Mons (carrieras bilinguas), Lo Muei, Seillans (panèu d'intrada: "Sias lou benvengu a Seillans", panèu de sortida: "A ben lèu, sigues prudent") Lei Sambras... (Mèfi que son en grafia mistralenca a 99%)
Ne sobra un molonàs, dirai pas qu'es sistematic, mai lei panèus d'intradas son totun pron ben presents dins lo departament.

laBèstiadelasBartasalas a écrit:

Danís a écrit:As pres contacte emb los topoinimistas reconeguts de ton parçan o ben d'alhors ?

Pel siti ai pro de fonts e pro d'experiéncia (cresi). Mes per l'estudi de tota la toponimia del canton de Doma que sèi a far, ai pres contacte emb lo Ives Lavalada, qu'es un pauc mon 'mèstre' en toponimia, per çò que m'ajudèt desjà dins lo temps que fasiái ma tèsi sus la toponimia de tres comunas.

En Peiregòrd, mai alhors, te conselhe lo Joan Rigosta, sap tot sus tot, e la toponimia, quo es son afar. Demòra a Brageirac.

Assajarai tamben de ti prendre quauquei fotòs, subretot dei placas de carrieras a Nimes (en grafia classica), e se trobi placas a l'entrada dei comunas (mai seran en grafia mistralenca)...

Bojarron a écrit:As per amira de donar un escapolon de la toponimia occitana de cada departament? Fonciones tre un nombre minimum d'estatjants per comuna?

Non, vòli donar lus noms de totas las comunas. Quand li son pas, es per çò qu'ai pas trobat de font pro fisabla. La còla deus Amics de Mesclum a fach de tièras per cada departament provençal, manca per lo Var... Me sèi donc limitat aus noms de caps-luècs de cantons, que me fuguèron comunicats per l'IEO del Var.

Frejús [...] Mi demandi meme, e aquí desvii un pauc, se la S finala es justificada estent que vèn de Forum Julii, e que se trobam d'escrichs ancians que li es marcat Frejus, trobam tanben Frejul. La S s'ause soncament en francés, e lo gentilici es Frejulenc...

Forum Iulii auriá donat *Frejuu en provençau (coma culu qu'es cuu), mes lo nom ven del locatiu plural *Foroiulis, que deven Frejús. Los gentilicis, en general, son artificials e basats suls noms latins o latinizats.

Ai emb aquò clicat dins "fòtos de la senhalisacion en occitan", qu'au dintre dones de chifras un pauc pessimistas!

Es per aquò que disi "Al mens x comunas" :-)
Mes se sès segur dels exèmples que dones, lus botarai tanben. Se pòdes me'n enviar de las fòtos, enquèra milhor !
Pensi pas que lus Conselhs Generals puèsquen donar aquelas informacions, per çò que son pas eusses que boton lus panèus...

Axel a écrit:Assajarai tamben de ti prendre quauquei fotòs, subretot dei placas de carrieras a Nimes (en grafia classica), e se trobi placas a l'entrada dei comunas (mai seran en grafia mistralenca)...

Mercé, quò m'ajudariá bien. Ai pas tròp l'ocasion d'anar d'aquèl costat d'Occitania.

Benlèu que'm pòs ajudar : demori en Sud-Gironda, dens ua comuna que s'apèra "Saint-Michel-de-Rieufret". Sabi pas com lo revirar en Occitan. Ei ensajat de consultar l'Atlas Linguistic de Gasconha a l'Universitat Bordeu , mes la responsa estó "Mais où on l'a mis ?!?" Benlèu que tu es espiant los isoglossa e tot aquò, as la solucion ...

L'Òmi a écrit:Benlèu que'm pòs ajudar : demori en Sud-Gironda, dens ua comuna que s'apèra "Saint-Michel-de-Rieufret". Sabi pas com lo revirar en Occitan. Ei ensajat de consultar l'Atlas Linguistic de Gasconha a l'Universitat Bordeu , mes la responsa estó "Mais où on l'a mis ?!?" Benlèu que tu es espiant los isoglossa e tot aquò, as la solucion ...

L'aguèt pas una discutida sus la wikipèdia a rapòrt d'aquela comuna justament ?

Pòdi tanben t'ajudar dins ton pregit, soi dins Avairon e conneissi qualques comunas amb la sinhalizacion occitana :

- Viviez --> Vivièrs

- Grand-Vabre --> Gand Vabre

- Almont-les-Junies --> Las Juniàs

- Saint-Cyprien --> San Cibrian

L'Òmi a écrit:Benlèu que'm pòs ajudar : demori en Sud-Gironda, dens ua comuna que s'apèra "Saint-Michel-de-Rieufret". Sabi pas com lo revirar en Occitan. Ei ensajat de consultar l'Atlas Linguistic de Gasconha a l'Universitat Bordeu , mes la responsa estó "Mais où on l'a mis ?!?" Benlèu que tu es espiant los isoglossa e tot aquò, as la solucion ...

Prumièra règla per conéisser lo nom occitan d'un vilatge : damandar la prononciacion occitana sus plaça. Coma li abites, quò pòt pas èstre dificile
Sans coneissença d'aquela prononciacion pòdi mas te donar totas las possibilitats probablas (12 !).
Quò's normal qu'ages pas trobat ton vilatge dins l'Atlàs Lingüistic de Gasconha (ALG). Sus las 450 comunas occitanas de Gironda, solament 23 fuguèron enquestadas !
Coma sabes, Saint-Michel se ditz normalament Sent Miquèu en gascon. Mes l'Atlàs Lingüistic de França (ALF) nos fai veire qu'aquèl petit nom apareis sus sa fòrma francizada en Gironda. Pels punchs de l'ALF pus pròches de tu : Michèl a Targon e Hostens, e Michèu a Sent Còrme. Lus toponimes estant sovent conservatius, se ditz benlèu enquèra Sent Miquèu pel vilatge... A verificar.
Rieufret, qu'es donc lo nom del riu que passa dins lo vilatge, es lo ruisseau froid. Aquí l'ALG dona tanben tròp de possibilitats : arriu a Pujòus, e arriu o riu a Saucats (punchs pus pròches). Parièr per froid : fred a Pujòus e freid a Saucats.
Le nom de la comuna poiriá donc èstre :
- Sent Miquèu d'Arriufred
- Sent Miquèu d'Arriufreid
- Sent Miquèu de Riufred
- Sent Miquèu de Riufreid
- Sent Michèu d'Arriufred
- Sent Michèu d'Arriufreid
- Sent Michèu de Riufred
- Sent Michèu de Riufreid
- Sent Michèl d'Arriufred
- Sent Michèl d'Arriufreid
- Sent Michèl de Riufred
- Sent Michèl de Riufreid
Se vòles mon vejaire, cal veritablament damandar sus plaça. Segur que te donarán simplament una traduccion de "Saint-Michel", caldrá damandar lo nom del riu separadament.
Ten-me al fial !

Lo Roergat a écrit:Pòdi tanben t'ajudar dins ton pregit, soi dins Avairon e conneissi qualques comunas amb la sinhalizacion occitana :

- Viviez --> Vivièrs

- Grand-Vabre --> Gand Vabre

- Almont-les-Junies --> Las Juniàs

- Saint-Cyprien --> San Cibrian

Mercé, Roergat !

Vaquí per exemple la Carrièra Pèira Molhada a Nimes, te mandarai leis autras fotòs quand lei retrobe!!! (lo mieu disc dur es un pauc en desòrdre... ). Seran dins una melhora qualitat tamben (Aquela l'ai facha ambé lo mieu telefòne... )

laBèstiadelasBartasalas a écrit:Sans coneissença d'aquela prononciacion pòdi mas te donar totas las possibilitats probablas (12 !).
- Sent Miquèu d'Arriufred
- Sent Miquèu d'Arriufreid
- Sent Miquèu de Riufred
- Sent Miquèu de Riufreid
- Sent Michèu d'Arriufred
- Sent Michèu d'Arriufreid
- Sent Michèu de Riufred
- Sent Michèu de Riufreid
- Sent Michèl d'Arriufred
- Sent Michèl d'Arriufreid
- Sent Michèl de Riufred
- Sent Michèl de Riufreid

Lo marridatge entre la toponimia e las probabilitats, aprèp diran qu'Occitània es pas a l'ora dau multimedia !