lo mon vejaire, qu'ei pas hèra originau de tot segur, b'ei qu'ua de las pistas mei eficaças tà lutar contrau fascisme en tant qu'occitans, b'ei de clamar e susquetot de crear de vertat la mescladissa, o puslèu que mescladissa la convivéncia de las culturas; aqui la luta culturau que's hè politica.
evidentament, qu'ei ua direccion que gahè l'occitanisme dempuish pausa, pensi que'ns cau enqüèra desenvelopar aquera union de tots los pòbles dispariers, que sian los nòstes vesins (bascos, catalans, bretons, còrses, francés!) e tanben los qui son mei esluenhats (e que sian minorisats o pas, per exemple los qui viven aqui e qui son originaris per exemple d'algéria, deu maròc, de kabilia, deu territòri berber, deu kurdistan, deu territòri senegalès......).
Be'ns cau de vertat construsir ua diversitat dens los hèits e susquetot ua egalitat, qui soleta podré sortì'ns de l'andròna racista qui'ns enclava cada jorn mei estret, ua diversitat efectiva e vertadèra, dens lo respècte de cadun e cadua, e a tots los grads, economic, sociau, politic, culturau, linguistic .. Includir los autes minorisats dens lo nòste projecte e dens las nòstas accions; e perqué pas convidar hèra mei de monde a las manifestacions occitànas - associacions e moviments de cada sector de la societat, e de cada provenància
Tot aquèra construccion que passa per lutar tà la libertat generalisada deus pòbles a dispausar d'eths-medishs, solide, mès susquetot au nivèth locau occitàno-francés, per la luta tà l'arrespècte de cada ciutadan, de quauqua origena que sia, de l'arrespècte deus sons drets e de la soa faiçon de viver...
que pòt tanben passar per ua arredefinicion vertadèra de l'ideia de nacion (tad aquò, caleré evidentament sortir deu carcan dens quau ei empresoada l'ideia nacionau dens la pensada francesa, totjamei ligada a l'etnisme o aus corrents reaccionaris... mès vertat que'u passat de l'ideia nacionau en frança n'ei pas hèra gloriosa), e tanben per l'evaluacion seriosa de la plaça deu sentiment nacionau dens la vita colectiva contemporaneva. aqueth sentiment que'm sembra jogar un ròtle plan mei important que çò que'n ditz l'esquerra francesa -qui denega totau aqueth factor, e aqui parli tanben e susquetot de l'esquerra vertadèra, pas de l'esquerra-Pseudo Socialiste
Atau, ua arredefinicion e ua sosca entà plan analisar aquèra plaça, e dab un punt de vista mei progressiste que non pas lo que causi la dreta reaccionaria dab lo son ministeri de l'identitat nacionau e de l'imigracion, que pòt estar un purmer pas deus nessits entà lutar contra l'eishida de las ideias fascistas suus nòstes territòris.
la nacion qu'ei ua realitat, la denegar que mia totjamei au fascisme tantplan com de la des.héner tròp.