Accueil
La Setmana es un còp de mai victima de discriminacion. Es en tot cas atal que consideram lo refús que nos es fait de nos ajudar coma d'autras publicacions que vòlon crear un servici d'informacion en linha.
La Comission Paritària de la Premsa e de las Agéncias de Premsa (CPPAP) ven de nos far saber que nos acordarà pas l'ajuda qu'es prevista per la premsa d'informacion.
L'argument que nos es donat es que cream un site que serà exclusivament en occitan. E aquò, segon la responsa qu'avèm recebut nos lèva lo caractèr « d'informacion politica e generala ».
En clar, se volètz participar al pluralisme de la premsa e profieitar de l'argent public per aquò far cal escriure en francés !!!
Vistedit qu'es la societat qu'edita La Setmana e que vòl crear aquel site en linha a pas los drets de las autras enterpresas francesas sonque per de rasons lingüisticas.
Las ajudas a la premsa son donc bastidas sus de critèris qu'an pas res a veire amb los principis d'egalitat mas ara i cal ajustar lo critèri lingüistic.
Sola la lenga francesa pòt èstre lenga d'informacion e ajudar los ciutadans a se fargar lors opinions.
Una entrepresa basca qu'a fait la meteissa demanda a tanben recebut la meteissa responsa.
Discriminacion lingüistica, e après sus quina basa se faràn las causidas per ajudar tala o tala publicacion que respond a tots los critèris professionals ?
Ne saupre mai sus la decision de la CPPAP : http://www.vistedit.com/actus/index.php?article=169
Ne saupre mai sul projècte de La Setmana : http://www.vistedit.com/actus/index.php?article=168
