Biarn : film sus l'emigracion biarnesa en Argentina

A la comencença de mai, serà presentat a Arudi (64) un filme sus leis bearnés qu’anèron assajar de si melhorar la vida de l’autra man de la mar granda, en Argentina. Pauc va sabon, a despart belèu deis occitanistas acarnassits, mai una part bèla, emai una part màger, dei francés que partiguèron s’ancrar au luenh per s’atrovar una vida mens dura èran de gents que venián dei campanhas occitanas. Despuei lei famós barcelonetas, que faguèron de dardènas au Mexic, lei bearnés qu’anèron trabalhar dins lei cosinas de Nòu York (e vos aconselhi de veire lo documentari que Cedric Viala e Amic Bedel faguèron per Piget Prod.), fins ai roergàs que crompèron de tèrras a Pigüe, au sud de Buenos Aires, son tota una tropelada de gents dei país d’òc que viatgèron per veire se l’èrba veniá mai verda encò dau novèu monde. Lo filme d’Anhés Lanusse e de Domergue Gautier no retracha l’istòria d’aqueleis montanhòus que parlavan ges de francés e que fugiguèron la pauretat de son país per anar dins aquel Eldorado qu’èra l’America miegjornala d’aqueu temps. Lei francés que repapian sempre que mai dei cosins d’America per dire dei quebequés oblidèron aqueu tròç de son istòria. Talament que lo conseu generau d’Aveiron faguèt una convencion l’a un parèu d’annada per desenvolopar l’ensenhament de la lenga francesa a Pigüe, una ciutat que totei lei gents que la faguèron parlavan… occitan !

http://www.amis-afab.com

http://www.pigetprod.com