København*, mauescaduda anonciada d’un somiu ipocrit

Que s’acabè lo 18 de deceme passat lo somiu mondiau de København sus l’arrecauhament climatic. Com ac podèvam prevéder, las negociacions enter govèrns n’an pas permetut que d’arribar a un sonque acòrd simbolic, non pas chifrat, qui n’aurà pas nat efèit tà la reduccion de pollucion en CO2 deu planeta. De mei, aqueth somiu qu’amuishè que’s hèn enlà l’un de l’aute los Estats dits occidentaus e los Estats mei praubes.

Entà Libertat, aquera mauescaduda n’ei pas tanpòc ua desillusion. Non podèva pas sortir arren de concrèt e d’utile d’aqueth encontre qui costè milions, e qu’ei ua engana d’esperar un miracle de la part deus caps d’Estats occidentaus qui produseishen la màger part de las emissions e son oposats a l’idea de decreishença.

L’argument avançat peu govern francés qui hè deu nuclear ua alternativa credibla qu’ei ua engana e que tornam díser a d’aqueth parat la nosta oposicion pregonda a d’aqueth tipe d’energia.

Qu’existeish au dia de uei un cambiament climatic devut en partida a l’activitat umana qui hica en causa l’aviéner deu planeta, mes voler sauvà’u shens cambiar radicaument lo sistèma de societat qu’ei ua eretgia.

Lo capitalisme, per natura, qu’impausa tostemps mei de produccion e de consum, pauc impòrtan los besonhs vertadèrs de las populacions. Atau non podem pas contunhar de víver d’aqueth biaish, e qu’avem tots de préner consciéncia que mesuras o refòrmas internacionaus ne pòden pas portar solucions vertadèras shens cambiar de sistèma economic e sociau.

København ne cambiè pas arren, ne’n cau pas esperar mei deu somiu de Tenochtitlan-México anonciat tà noveme de 2010. Adara que devem tots tribalhar entad apitar ua societat navèra aparada sus mòdes de produccion e de consum de proximitat, sociaument justes qui respèctan la diversitat culturau e biologica deu planeta.


Libertat Bearn

*Copenaga / Copenhague