Colectatge

Se i a gent qu'an hèit ja de colectatge que'm poden díser quin an hèit ?
Que voi en hèr dens lo men parçan, pr'amor que los qui parlan enqüèra plan la lenga son hèra vielhs ....
Mes n'èi pas nada idea quin se hè un colectatge

Sòfia a écrit:n'èi pas nada idea quin se hè un colectatge

Trapa de qué enregistrar e daissa lo virar tant que platussatz.
Lo Daniel Loddo me dissèt que fau pas jamai 'magar lo micrò, quò es un'affar de fisança.
Tamben es mielh de parlar de chausas que son interessantas mas quò se calcula pas en davant.

Einucent a écrit:
Tamben es mielh de parlar de chausas que son interessantas mas quò se calcula pas en davant.

Alavetz cau pas preparar las questions abans ?
E tà enregistrar que tipe d'instrument avetz besonh ?

Sòfia a écrit:Alavetz cau pas preparar las questions abans ?

Depend, si quò t'ajuda fai-lo, si quò te bloqueja, fai sens. Dèu èsser de tu, i a pas de recepta miracle.

Sòfia a écrit:E tà enregistrar que tipe d'instrument avetz besonh ?

Sauria pas decrire lo materiau qu'utilizam,(DAT crese) mas me sembla que lo pitit MD combina los interest de pès, de volume e d'aisança per trenchar l'enregistrament en mantunas pistas distintas.

Mon paire, coma lo Daniel, començèt amb un Uher 4400.

parrièr que quèu de quí mas amb un gros OC pejat dessur

Jo qu'ei hèit dab aquò. Qu'es plan quan an un ordinator, pr'amor enregistra en mp3 o en WAV. Un sòu chepic : qu'es fragil.

Qu'es a quò que pensave, mas cresia que se fotia un MD dins lo ventre.

Si as un ordinator portable, que pòdes dab un logiciau qui s'apèra AUDACITY. Que's telecarga a gratis sus internet.

Que me'n serveishi tau men tribalh: qu'ei hèra practic, de bon manejar, e que permet d'enregistrar tanben en MP3.

Se'u telecargas, que't poderèi ensenhar quin fonciona.

Mes que't cau aver un ordinator e un micro.

L'Òmi a écrit:Jo qu'ei hèit dab aquò. Qu'es plan quan an un ordinator, pr'amor enregistra en mp3 o en WAV. Un sòu chepic : qu'es fragil.

Vese plan, ai vòugut m'en servir pendent l'Estivada, sabe pas ente l'as fach trainar, era raiat d'en pertot sus la còca en plastic, mai lo locau a pilas menaça tot lo temps de se dubrir tot sol...
Per contra, 'queu afar a una puta de son e un costat pratic sens egau. Mas bon, per nonmas de la votz, un MD sufis tanben, se fau pas tròp charjar, mai l'instrument es gròs, mai l'interlocutor n'aurá paur.

Per çò qu'es de la metòda, te conselhariá de damandar a Casteret, de l'Institut Occitant de Pau, quo es son trabalh. O alara, te complicas pas, e te laissas portar per çò que ditz ton interlocutor. Oblidarás benleu de las chausas, mas mens que se lo colectatge s'era pas fach...

Que pòdes demandar en efèit a l'Institut occitan de Pau. Demanda tanben a Nosauts de Bigòrra, la seccion 65 de l'IEO. Eths que hèn hèra de colectatge.

mercés per las infòs !!!
Peu moment que hèi ua lista deus qui parlan plan la lenga dens lo parçan ( atau èi descobert dus tipes hèra implicats dens la cultura nosta, mes son ja mòrts )... e sosqui sus lo tipe de colectatge que voi hèr ...

Quora ne fau un pauc m'alestissi un memo adralhat rapòrt a la persona emb quauquei tèmas, e pasmens pron dubert se per cas n'aguèssi besonh. Après verai coma ti foguèt dich que depende de tu e de ton gaubi, ben que pòsque èstre pron necite se tombes sus quauqu'un de reservat, m'es arribat d'èstre content d'aver un parèu de questiens sota la man!

T'aconselhi de crompar lo libre 'Langue & mémoire du pays de Guéret', editat pel Conselh General de Cruèisa en 2007. Aquela publicacion dona lus elements lus pus interessants del collectatge fach en 2004 e 2005.

Lus sujèts (citi l'ensenhador) :

a) la littérature orale
- contes, histoires, légendes, mimologismes...
- le répertoire chanté
- dires et dictons, blasons de village
- comptines, berceuses, devinettes, proverbes, expressions, prières
b) le temps et les jours
- une année au quotidien
- la cuisine
- du berceau à la tombe : la vie et ses passages

Tot aquò es seguit d'un descriptiu dialectologic. Quò's una matièra complicada, mes s'as pro d'enregistraments, qualqu'un pòt lus analizar per tu.

De mai, mentre que li sès, deuriás damandar lus noms occitans deus endrechs. Una cançon o un conte pòt s'enregistrar dins de diferentas comunas. Mes i a mas lo monde sus plaça que pòdon dire lo nom occitan de tal o tal endrech. Es un trabalh qu'a besonh d'un pauc de preparacion. Pòdes trobar lus noms del cadastre sus www.cadastre.gouv.fr. S'as pas lo temps de zo far, diga-me qualas comunas vas visitar, te farai la tièra dels toponims.