Jo, èi pas vergonha de trabalhar a l'IEO 31. Apuèi, disi pas qu'es lo sòmi e que tot es remirable, luènh d'aquí. Sonque, me maini que l'IEO cèrca la professionalizacion e ensaja de crear de "vertadièrs emplecs": de CDI e non pas coma d'autras associacions occitanistas que te prenon lo monde e te las escampan tanben lèu-fait (la tièra seriá tròp longassa de las citar e me fariái benlèu pas d'amics aicí). Apuèi, los sectors d'activitats d'una seccion IEO a un autra son plan diferents pr'amor que las donadas socialas, demograficas, culturalas, economicas son pas las meteissas d'un departament a un autre. Avèm 5 sectors d'activitas a l'IEO 31 e aquelis 5 sectors se poirián pas far per exemple a l'IEO 46, 81 o 15. Per çò que tòca las subvencions, va plan tanben, pr'amor qu'es la moneda dels corses que permet d'autofinançar lo mieu pòste (alavetz mon patron a pas besonh d'anar plorar en anar véser las collectivitats ...). Anar véser las "institucions jacobinas del territòri", qué vòls que te diga, me pensi qu'avèm pas gaire la causida (encara que la moneda, la podèm anar quèrre fòra de França tanben) e puèi es lo quotidian de tot lo mitan associatiu cultural (e que n'avèm una experiéncia de las bonas ambe mon fraire). Per la protèsta de Carcassona, aquò me fa venir en òdi. En mai d'aquò, coma per las protèstas de Carcassona de 2005 e Besièrs de 2007, i aurà pas digús en Garona Nauta per far lo trabalh de coordenator e los balhaires de leiçons de l'occitanisme vendràn véser l'IEO 31 per nos díser de far aquel trabalh. E coma per Carcassona e Besièrs, soi jo que farèi aquel trabalh ingrat que digús vòl pas far (es mai aisit de repotegar, criticar e balhar de leiçons). Levat qu'aqueste còp, èi pas brica enveja de far aquò. Far un trabalh de terrenh al prèp de totas las associacions d'aqueste departament de Garona Nauta, conscientizar lo monde, organizar los acamps, se mainar de la comunicacion e de las inscripcions, n'aurèi pas brica enveja. Serà estranh perque me diràn a l'IEO 31 de mobilizar mentre que jo anirèi pas a Carcassona talament soi malcorat ...
E puèi, per Carcassona 2009, es tot lo comitat "Anem Òc" que n'es responsable e pas sonque los "maissants" de l'IEO (de çò qu'èi comprés, lo Felibritge èra pas tròp caud per que la protèsta se debanèsse en Provença ...). Per la benlèu subvencion de la comuna de Carcassona, segur que preparar una manifestacion, aquò se trabalha e qu'aquel trabalh a d'èsser pagat (es pas coma lo milierat de personas qu'arriban lo quite jorn de la protèsta solet dins lor veitura sense aver pas res fotut e subretot que se pausèron pas la question "de qué poiriái far, cossí poiriái ajudar, ...?". Non, es mai aisit apuèi de far de dintra-dedins al prèp de l'IEO o del Comitat d'Organizacion "Anem Òc"). Pr'aquò M..., soi pas tanpauc marridat ambe l'IEO o lo pichòt mitan cultural occitanista, alavetz un jorn o l'autre, ... Per acabar, la situacion DELS IEO es segurament pas perfièita mas la creacion d'aquelis emplecs a permés de far avançar plan de causas. E es pas mercés a d'unas associacions del Comitat Anem Òc qu'auriam poscut far Carcassona de 2005 e Besièrs de 2007, me pòdes créser. Apuèi, disi pas que tot se passèt coma cal (subretot a Besièrs).
Accueil
