Estivada 2006

ESCHANTITS

Avem desjá parlat de ilhs dins una autra rubrica. Regrete de pas n'aver filmat mai.

CHIN-NA-NA-POUN

A la la. Meravilhós. Enquera, aqui, nos en rendem pas tròp compte, mas apres aquela, ai pausat la camerá per profitar a fons de queu concert de folia. Tots los qu'i eran n'en garden un sovenir...remirable.

JOAN-FRANCES TISNER

Aquò tanben qu'era tarrible. Un exemple : Verdier, pas conegut per esser un amator de trad (la musica de Tisner, abitualament) a dich qu'era tarrible. Per io quo es un signe.

D'AQUI DUB

Aviá assistat a las balanças e 'quò m'aviá bien plagut. Mas lo ser, sabe pas perque, m'a pas agradat. Una (n'i a pas 'gut gare, de mon punt de vusda) de las decepcions...
D'aqui Dub, un grop a veire pendent las balanças ?

JAN DAU MELHAU / RENAT SETTE

N'ai pas tròp filmat, quo era pas dins mon estat d'esperit dau moment. En tot cas, los ai trobat plan en fòrma, enfin, sens comptar lo braç en mens de Sette. Qu'es una legenda estivadenca, mas pareis que s'es pres los pés dins las chadenas que i a sus lo costat daus trepadors dins tot Rodés... los qu'an fach la vila saben de que parle...

TRANSOCCITANIA

Una bona suspresa tanben, quitament se demorem dins una gama trad. An botat dau temps a se botar en plaça (lurs concerts d'aqui d'alai eran pas tan plan). Mencion especiala au bassiste e aus ingeniaires dau son, que son parvenguts a plan egalisar tots los instruments, çò que plaçava tot lo monde a egalitat, e balhava un son tarrible.

JOGLAR'VERNE

Bon, aquò a pas agradat a tot lo monde (sentem tròp la dobla influença Massilia/Fabulous). Mas io ai passat un bon moment. E non, sei pas particularament bon public, maugrat totas las flors que mande dempuei la debuta...

LAURENT CAVALIE

Tarrible. Regrete de pas esser demorat mai longtemps, mas i aviá una chausa a pas mancar en mesme temps. Puta de programacion a chavau...

ERIC FRAJ

Espectacle interessant : una istòria (la de son grand-paire) contada cronologicament, dempuei son despart de Valencia (a la debuta las chançons son en catalan), a son passatge de la frontiera (en castilhan) e a sa 'ribada en lengadòc (ente compren pas lo fach que comprena tot chas los paisans que parlen patoes...). Apres, coma totjorn chas Fraj, i a de las lonjors.

FAYDITS

Bòf. Io, quo es pas tròp mon afar (dins l'estil "hard blues", aime mielhs ZZ Top... ), mas an 'gut un succes...pitit, mas n'an 'gut un.

LO DALFIN

Especiala dedicaça a Joan Cavalier, Lucia, Matieu, Ceba E Roi (), enfin breu, tots los qu'aimen Flipper... perdon, Sergio.
E lo BOUM BOUM iper saturat, qu'ausissetz, quo es lo micrò de la camerá que sufrís... Ai cregut sa darriera ora 'ribada. Io sei demorat sord demi-ora, era tot contra la bafla, donc...

JOAN-PAU VERDIER

N'avem desjá parlat, me vau pas espandir dessus.

LA TALVERA

A, La Talvera. Ai pas vist lo temps passar, coma ilhs.

MOUSSU T E LEI JOVENTS

Bon, e coma n'ai filmat 27 minutas (e òc, qu'er per 'chabar la banda, e perque l'ambient era tarrible), ai estat oblijat de zo botar en doas partidas.



A, lo Moussu, sa biera, son banjò, sas blagas...
Veiretz, a un moment m'avisa e me ditz "Je te vois, tu es frit-confit !".
A notar tanben la presencia de Matieu C., que me botava sistematicament lo drapeu marselhes davant l'objectiu... t'auriá tuat, Matieu, pense...

LOS BONUS

E òc, io sei un aficionado daus bonus dins los DVD, donc quand pòde, n'en bòte. Emb totas las chutas qu'ai, de tota faiçon...

LO CABARET D'ÒC 2006

Lo Cabaret era pas tan digne d'interes qu'en 2005 o ujan, çò qu'explica la durada corteta (7 minutas) daus films, per rapòrt au Cabaret de 2005 (e lo de 2007, ai pas tornat veire, mas pense qu'avem plan filmat). Au programe : La fanfare daus Goulamas'K, Tres A Cantar (final version, 'queste còp) e Transoccitania.

LA LEIÇON D'ACCORDEON

Perque 'quela videò ? E perque pas ? Bon, d'aqui a botar la videò sus internet, i a un pas, mas coma tot lo monde m'aviá reprochat de pas pro filmar çò que se passava en defòra daus concerts oficiaus, sei anat sus los estands, e per v'autres, ai trobat Francesco. Coma vesetz, juga de l'acordeon. Pratic, son biais de jugar, per las goiatas, o coma òm n'en bòta plen los uelhs...

LO "BOEUF" DE LODDO-NUX VOMICA-MOUSSU T

'Quò, qu'es un bon apres-espectacle, emb Loddo a l'accordeon, Nux Vomica au tamborn e au pifre, e Tatou, a... a la carpa...?

MANU ERA PERTOT !

LO bonus ultime.
Aqui, veiretz que i a un element, o una persona pusleu, que tòrna sistematicament dins mas chutas. Ai brodat un pauc dessus. Espere que l'interessat se vexará pas. Mas m'estonariá, quo es un omenatge...
Per tu, Manu...

Veiqui, ai 'chabat.
Perdon aus gropes qu'ai oblidat, o qu'ai pas 'gut lo temps de filmar (Joanda... ).
Ai filmat Gric de Prat, mas, a mens d'una damanda especiala de Lucia, la botarai pas. Sabe pas çò que se passet, mas lo son (de la camerá, è, pas dau concert, me sovene, au concert, qu'era bien) es poirrit. E coma de tota faiçon, n'ai pas filmat fòrça, pense que quò serv de ren. Perdon per los que 'quò interessava.

Me demòra enquera de chausas que sabe pas tròp que n'en far, coma lo discors de Sergio ("Io m'en foti de Materazzi, io m'en foti de Zidane, io soi occitan, e soi aici per d'occitans, e vai fanculo tota la resta...") o de Loddo ("pissar sus las frontieras") e quauques bocins de chançons d'aqui d'alai.
Aviá previst de los samplar a la debuta (per me far un fond musicau sus los menus daus DVD, mas fin finala, i aurá pas de DVD, manca se zo damandatz) mas aurá qu'ai delegat tot çò qu'es son a L'Òmi, li fau damandar directament se n'en voletz mai.
Mas coma a pas l'aer motivat en 'queu moment...

Anem, daissatz vòstres comentaris !

E a leu per l'edicion 2007 !