Communicat de Libertat Bearn:
Dimercs lo 14 d'abriu de 2010, qu'estó anonciat en la premsa locau biarnesa la reorganizacion generau deu sistèma de senhalizacion de la vila de Pau. Dens los mes a viéner, numerós panèus senhaletics qui seràn cambiats entà guidar miélher los automobilistas e desengorjar atau lo centre-vila.
Aquera reestructuracion qu'ei lo parat de reparar lo temps perdut en mestion de bilinguisme. Qu'estó sovent dit peus elegits que la mesa en plaça deu bilinguisme e còstava tròp car a la collectivitat. Dab centenats de panèus naveths qui van espelir per carrèra, qu'ei lo còp o jamèi entau capdulh de Bearn de tornar balhar a l'occitan la plaça que s'amerita en aquera vila.
Atau qu'esperam que dens un futur pròche, la maira de Pau que validarà aquera perpausicion e que's virarà de cap tà las estructuras competentas qui poderàn ajudar a arrevirar lo contiengut deus panèus de la vila. N'esitaram pas de portar aquera reivendicacion auprès de la deputada-maira Martina Linhèra-Casso en li tot brembar las soas promessas de campanha electorau.
Lo bilinguisme occitan/francés qu'ei ua simpla question d'arrespècte: los biarnés e las biarnesas qu'an lo dret de víver dab la lor lenga. Qu'aperam totas las associacions occitanas de Bearn a juntà's a d'aquera reivendicacion e a tribalhar dab nosauts entà concretizar la.
Pau en occitan ? Quiòc !
Libertat Bearn