Anaram Au Patac movement revolucionari de l’esquera occitana
COMUNICAT DE PREMSA - COMMUNIQUE DE PRESSE / 25-09-2008
Anaram au Patac que condamna l’operacion policièra francésa contra l’esquèrra independentista basca
Lo movement revolucionari de l’esquèrra occitana Anaram au Patac que constata un còp mei que lo govèrn francés e persegueish l’estrategia policièra e judiciària que mia Madrid per ua carrèra bòrnha desempuish mei de 10 ans en la soa luta contra lo movement de liberacion basco.
Las arrestacions espectacularas qu’estón hèitas per aqueths dias contra los representants de Batasuna que son l’illustracion d’aquesta collaboracion e de la mesa en scèna gavidada per Madrid entà criminalizar movements publics, arreconeguts, e militants arrespectats.
De l’aute costat deus Pirenèus, la justícia espanhòla qu’a illegalizat l’expression politica d’ua part de la populacion qui ne demanda pas que lo dret a autodeterminà’s e a deféner un projècte politic d’esquèrra. Aquò qu’ei la mesa en plaça d’un Estat d’exepcion qui ne pòt pas qu’esluenhar la resolucion politica deu conflicte, un conflicte que Madrid e París declaran totun voler estancar.
L’Estat francés, dab la soa experiéncia qui vadó en l’anciana Indochina, en Argeria o en Canaquia, n’a pas comprés arren ? E pensa que podem har carar per fòrça un pòble qui’s quilha ? E tot aquò shens forçar los principis signats en las instàncias internacionaus ?
Que brembam que la Guardia Civile e la Policia Nacional espanhòla que son tot an accusats de tortura contra militants bascos arrestats, e que la polícia e la justícia francésas e tribalhan, per ua part, dab informacions qui estón tiradas per aqueth biais.
Pr’amor tot aquò e pr’amor Anaram au Patac e reivindica l’arrespècte deu dret a l’autodeterminacion, que condemnam aquesta operacion policièra navèra contra l’esquèrra independentista basca. Ua operacion disproporcionada contra militants publics, qui tienen ua familha e emplecs, e que la polícia podèva convocar.
La repression n’ei pas la solucion. Sonque las negociacions e lo respècte deus drets deus pòbles e permeteràn de resòlver lo conflicte.
Anaram au Patac, que vòu tanben aperar las organizacions, los sindicats e las associacions qui’s disen progressistas a espiar çò qui’s passa en País Basco sud e nòrd. Tecnicas repressivas que son a l’òbra, qui serviràn e qui serveishen dejà entà reprimir los movements sociaus e politics jutjats tròp subversius peus Estats.
Anaram au Patac que’s solidariza dab las reivindicacions de las manifestacions qui’s debanan aquesta setmana e qui’s debanaràn dissabte 27 de seteme a Baiona, a 16h plaça deus Bascos, e a Bilbao lo dissabte 4 d’octobre a 17h30.
OCCITANIA !! Forum