Ua ninoèra bilingua occitan-francés en vath d'Aussau, non serà pas
tà la rentrada de 2008. A maugrat deus recents debats
parlementaris sus las lengas ditas regionaus e sus la lor inscripcion
en la Constitucion, suu terrenh, pas arren n'ei ganhat. Luc Grard, lo
director de la CAF, la Caisha de las Alocacions Familhaus,
qu'arrefusa tostemps d'arreconéisher la lenga nosta.
Qu'ei complicat, còps que i a, de seguir la logica de las
institucions de noste. En vath d'Aussau, que's hè hrèita
despuish annadas d'un establiment entà arcuélher los
petits mainats. E despuish mantuns mes adara, parents aussalés
sostienuts per elegits qu'an aviat un projècte de ninoèra
bilingua, suu parçan de Laruntz. De la debuta enlà, la
CAF qui amassa a l'encòp Biarn e Sola n'ei pas estada hèra
estrambordada per aquera perpausicion. E n'esto pas aisit entaus
miaires deu projècte, arron mantuns mes de pelelhas,
d'encontrar aus gavidaires de l'organisme: qu'ei causa hèita
despuish l'amassada deu 22 de julhet passat, en companhia deus maires
de Laruntz e de Lobièr de Haut, ua preséncia importanta
entaus parents puish a qu'amuisha lo sostien deus politics deu
parçan.
A maugrat d'aquò, lo dossièr remetut la setmana passada esto
jutgat insufisent per la CAF, qui vòu la garantia que los
mainats deus parents qui arrefusan la preséncia de la lenga
non sian pas jamèi en contacte dab l'occitan. « Ua
causa de non pas concéber », segon Sarah Vidal, ua
maman qui pòrta lo projècte, e qui pensa qu'aqueth
ambient bilingue e va assegurar lo plan-estar deus nenès, ua
causa pas extraordinària puish a que's hè dejà
en Pais Basco Nòrd, e qu'ei finançada per la CAF.
« N'ei pas normau, e que serà suprimit », auré
responut lo sénher Grard a d'aquera amassada, qui pensaré
tanben que la lenga basca, e occitana donc, n'an pas nat aviéner
en la societat.
« La CAF que ditz que vòu privilegiar lo servici public, mes ne'n i
a pas nat a noste per çò qui ei de las ninoèras
! » çò ditz Sarah Vidal.
S'estima mei, se sembla, a la CAF Biarn e Sola pas nada ninoèra en la
vath, qu'ua ninoèra bilingua, los parents que demoran totun
motivats. Que van modificar lo lor dossièr, en precisar mei lo
fonccionament concret deu bilinguisme en aquera futura ninoèra,
e en esperar la decision de la CNAF, l'organisme nacionau de la CAF,
qui's deveré prononçar a la debuta deu mes de seteme.
La prioritat qu'ei au dia de uei d'apatzar la situacion, de gahar personau
bilingue disponible e de's concentrar suu besonh de las familhas
aussalèsas. Ger ser a Laruntz, l'associacion deus parents
qu'organizèn ua animacion de Fandangò au cinemà,
entà har valer lo lor projècte, e balhar enveja aus
politics de tornar préner aquera reivendicacion populara a
l'encòp sociau e culturau.
M.C.
OCCITANIA !! Forum