OCCITANIA !! Forum


Vous n'êtes pas connecté. Connectez-vous ou enregistrez-vous

Santa Estèla

Voir le sujet précédent Voir le sujet suivant Aller en bas  Message [Page 1 sur 1]

1 Santa Estèla le Ven 4 Juin - 9:01

Mertyl


Occitan Warrior
Occitan Warrior
Lo comunicat après la reünion dels vièlhs felibres :


Santo-Estello 2010


La Santo-Estello es lou Coungrès annau dóu Felibrige. Se debano cade an dins uno vilo diferènto di Païs d'O.
Aquest an la Santo-Estello s'es debanado dins la viloto de Castihounés, en Perigord, dóu 21 au 25 de mai.
Li felibre soun esta aculi pèr lou coumitat Santo-Estello, qu’emé li felibre dóu païs, l’óufice dóu tourisme de la vilo, an ourganisa l’ensèn dóu Coungrès e l’an mena emé coumpetènci e eficàci, aculi peréu pèr lou municipe de Castihounés en la persouno de soun conse Segne Pèire Sicaud

Lou Coungrès a coumença dins l’après-dina dóu divèndre 21 de mai quand sus la plaço di courniero lis enfant dis escolo an baia un bèl espetacle ounte an moustra coume deja sabien maneja la lengo nostro …
Aquel espetacle fuguè segui de l’inaguracioun de quàuqui bèllis espousicioun : foutougrafìo de pijounié e moulin pèr Glaude Costes ; rebat di principàli manifestacioun de l’Annado Mirèio ; presentacioun di Mantenènço dóu Felibrige ; Istòri de Castihounès. De mai se poudien vèire dins de boutigo de la vilo de coustume tradiciounau de Guiano e de Perigord e à la Posto l’espousicioun « Perigord terro d’O ».
Pièi lou Capoulié acoumpagna dóu Conse e di felibre se gandiguèron fin qu’à l’intrado de la vilo ounte fuguè inagura lou panèu « Castilhonés » e just après, un pau pus luen, la carriero « Frederi Mistral ».
Après soupa, lou Burèu Generau dóu Felibrige s’acampavo pèr travaia dins la salo dóu Counsèu municipau. Dins lou meme tèms, dins la glèiso cacaluchado de mounde, lou group « 2B2R », vengu de Còus, regalavo lis espetatour emé de cant poulifouni en lengo d’O.

L'endeman, dissate 22 de mai, tre 9 ouro la plaço di courniero se troubavo pleno de proudutour de proudu loucau, un grand marcat de païsan e de mestierau de touto meno. Li felibre poudien à sa counvenènço vesita la ciéuta e ana escouta Segne Glaude Costes que faguè uno dicho saberudo sus li bastido, aquéli ciéuta creado generalamen de touto pèço i siècle 13en e 14en siegue pèr li francés, siegue pèr lis anglés que segnourejavon sus uno grando part di terro dóu païs.
Sus li cop de 11 ouro e miejo segne Pèire Sicaud, proumié Conse aculissié óuficialamen li felibre, après li calourènti dicho d’usage, lou municipe pourgissié un vin d’ounour.
Cadun pousquè pièi manja à la bono apoustoulico ço qu’avien croumpa au marcat di proudutour.
Dins l’après-dina lou Counsistòri s’acampè pèr uno longo sesiho de travai. Fuguèron passado en revisto lis ativeta coumplido despièi la darriero Santo-Estello, d’ourientacioun pèr l’annado à veni fuguèron presso, e pièi fuguèron elegi dous nouvèu Majourau.
Dins lou meme tèms se debanavon sus la plaço, de jo tradicounau presenta pèr l’Oustau de païs « La lemosina » de Sant-Auvènt. Li felibre emai un fube de mounde poudien peréu assista i dos counferènci prepausado : « l’escolo de Jansemin » pèr Andriéu Bianchi, emai uno de Jan Rigouste sus « La toupounimìo di païs d’O – patrimòni à preserva » ; tóuti dous faguèron mirando e sachèron baia d’enfourmacioun saberudo tout en parlant simplamen pèr lou plesi de tóuti.
En seguido de group d’Art e tradicioun poupulàri baièron d’escapouloun de soun talènt en cantant e dansant sus li plaço de la vilo. Dins lou meme tèms, à la glèiso, la couralo biarnéso « Montanhas e Ribera » d’Oulouroun impressiounè lou publi, que clafissié la glèiso, pèr la bèuta, la qualita magnifico de si cant e de si voues. Devers 6 ouro de vèspre, èro Dono Duverger e Marcèu Esquieu que regalèron li gènt emé « Fabuladas », de fable de Jan de La Font asatado en lengo d’O.
Après soupa, sus la plaço di courniero, mai de 700 persouno faguèron cachiero au group « Peiraguda » mena pèr Jean Bonnefon ; aquéli cinq cantaire e musicaire baièron un bèu recitau emé de cansoun de creacioun pleno de fe e d’engajamen emai quàuqui cansoun tradiciounalo represso en cor pèr la foulo.

Pièi lou Dimenche 23 de mai, à coumta de 10 ouro aquéli que voulien poudien assista à-n-uno messo en lengo nostro celebrado pèr lou Majourau-abat Jòrgi Passerat qu’à l’acoustumado emé sa fe e soun estrambord aubourè l’afecioun di fidèu.
Autant lèu après aquelo messo se debanè un grand passo-carriero que faguè lou tour de la ciéuta emé li group d’Art e tradicioun poupulàri vengu di sèt Mantenènço ; tout de long di carriero, de centeno de gènt plagniguèron pas si picamen de man. Tóuti, participant, felibre emai … badaire, venguèron pièi se groupa sus la grand plaço (di courniero) aculi pèr lou Coumita d’ourganisacioun d’aquesto Santo-Estello mena pèr lou jouine e forço valènt felibre Frederi Reynaud. Lou Capoulié En Jaque Mouttet larguè : « De vous senti fièr aqui dins vòsti vèsti tradiciounau e la culturo nostro cavihado au cor, vous voudriéu faire coumprendre quant avès de chabènço de viéure un ideau de vido. Vous demande de n’avaloura lou bonur, d’agué counsciènci d’aquelo chanço. D’efèt, quant de mounde an l’ur d’aparteni à-n-uno identita forto coume la nostro ? De l’espremi plenamen, sènso retengudo, de n’agué li mejan e la counsentido ? Quant de mounde, quant de pople en erranço o badaiouna soun en bousco de sa culturo, n’en soun ourfanèu, soun desmama ? Quant soun, pièi, qu’an tout perdu, qu’an óublida sa culturo naturalo o que la mespreson ?
Soun de plagne aquéli vitimo o aquéli renegat qu’estimon mai se rebala dins uno culturo (un semblant de culturo ) unico, fadasso e aplanado qu’a ges de sens, qu’a ges de racinun. Ami, au regard d’aquéli paurassas, pourtas en vous un tresor, uno sabènço, uno istòri, li foundamento d’uno civilisacioun. Recatas en vous l’espèr e la chanço de la culturo d’o dins touto sa diversita e si formo d’espressioun. Sias li maioun de la cadeno qu’asseguro la perdurableta de l’eiritage de nòsti paire, respoundès de soun aveni… »

Sus li cop de tres ouro après-dina, à l’oumbro fresco dis aubre de la plaço de l’Ourmiero, se debanavo « la Court d’amour » ; de centeno e de centeno d’espetatour aproufichèron d’un magnifiqu’ espetacle de cant e danso di païs d’O baia pèr de group vengu di diferènti Mantenènço dóu Felibrige.
Es à 5 ouro e miejo que lou mounde se retroubèron en foulo, dins la bello e grando salo dóu cinema, pèr la sesiho academico di laus prounouncia pèr li Majourau elegi l’an passa à la Santo-Estello de Seloun : Lou Majourau Sèrgi Bec prounounciè lou laus de Marcèu Bonnet, lou Majourau Francés Pontalier aquéu de Franc-Louis Depoutot e lou Majourau Nadau Lafon parlè de soun davancié Patric Revellat e faguè subretout lou laus di valour felibrenco, un laus magnifi qu’impressiounè lou publi pèr la qualita de la pensado e dis idèio espremido .
De vèspre, sus la plaço di courniero, i’avié tourna-mai de centeno e de centeno d’espetatour pèr escouta lou parèu Danié Chavaroche e Jan Bonnefon que nous faguè espeta (emai ploura !) de rire emé si raconte sus lou mounde dóu rugby : « On n’est pas venu là pour en prendre ». Quàuquis un remoumièron un pau perqué l’espetacle èro majamen en francés, mai aquel espetacle sus un sujèt qu’es uno part de nosto culturo reculiguè li picamen di man afouga de la quàsi unanimeta dis espetatour.

Lou Dilun 24 de mai tout de long de la matinado, se debanavo lou Counsèu Generau dóu Felibrige (Acamp Generau di felibre delega de tóuti li Païs d'O) presida pèr lou Capoulié Jaque Mouttet. Raport mourau, raport d'ativeta, raport financié e proujèt d'aveni se soun sucedi fin qu'uno ouro dóu tantost.
Dóu tèms d'aquelo assemblado de trabai, li felibre an discuti sus un mouloun de sujèt, entre autre :
- Bilans de l’annado Mirèio, que se soun debanado mai de dous cènt manifestacioun, celebracioun e creacioun dins tóuti li païs d’o.
- Grando manifestacioun de Carcassouno d’óutobre passa que i’an participa mai d’un milié de felibre. - Obro coumplido pèr lou counsèu de l’Escri Mistralen que refreto lou diciounàri « lou Tresor dóu Felibrige » de Frederi Mistral, la letro D es acabado e lis acamp à veni saran un pau mai noumbrous fin d’ana un pau pus vite dins aquelo obro de messo à jour.
- Museon arlaten : es barra pèr 4 an e uno presentacioun óuficialo dóu proujèt de l’architèite sara facho lou 2 de jun que vèn en Arle.
- Participacioun à l’estivado de Roudès, lou Felibrige sara tourna-mai presènt aquest an dins aquelo manifestacioun qu’es uno grando veirino de nosto culturo d’O.
- Asatacioun de l’estruturo amenistrativo dóu Felibrige (Mantenènço) au partimen amenistratiéu de la Franço.
- Perseguido de l’engajamen dóu Felibrige demié li diferènt mouvamen que revendicon de dre e de mejan en favour di lengo regiounalo de Franço (la lengo d’O en particulié).
- Perseguido de la realisacioun d’uno metodo audio-visualo d’aprendissage de la lengo d’O dins si diferènti varieta, aquesto metodo a reculi un soustèn estrambourdant di felibre qu’espèron despièi proun de tèms un óutis d’aquelo meno pèr lis ajuda à ensigna la lengo nostro.
- Duberturo óuficialo di grand Jo flourau setenàri dóu Felibrige.
- Pièi sus la fin de la sesiho venguè lou moumen de la reeleicioun dóu capoulié En Jaque Mouttet (èro soulet de se presenta à-n-aquelo cargo). Jaque Mouttet es esta tourna-elegi à la quàsi unamimeta. Tre la resulto anounciado, li felibre s’aubourèron tout d’uno pèr crida sa satisfacioun e ié faire d’ouvacioun mai-que-mai calourènto. Es esta uno meno de plebiscite d’uno poulitico menado despièi quatre an, poulitico de duberturo, de coumunicacioun e d’acioun en favour de la lengo e de la culturo d’o ; ansin li felibre an tourna-afierma sa fidelita is idèio de Frederi Mistral que soun toujour que mai d’atualita en aquelo debuto dóu siècle 21en.

Après lou Counsèu Generau dóu Felibrige, mai de 250 felibre se recampèron pèr la Taulejado de la Coupo.
Es à-n-aquéu moumen que soun esta prouclama li noum di dous nouvèu Majourau elegi pèr lou Counsistòri : lou felibre mantenèire Miquèu Desplanches, curat decan de Seloun de Crau (Prouvènço) e lou felibre mantenèire Pau Valière, de Peiro-bufiero, Sendi de la Mantenènço de Limousin.
De mai un sòci (membre assoucia) dóu Felibrige es esta nouma, s’agis de Segne Walter Meliga, especialisto de la literaturo di troubadou, proufessour à l’universita de Turin.
I’aguè encaro de noumbróusi nouminacioun de Mèste d’obro e de letro de felicitacioun adreissado à de gènt qu’an oubra pèr la culturo e la lengo.
En seguido, avans que de béure à la Coupo, lou Capoulié En Jaque Mouttet prounounciavo lou discours de la Coupo, disènt entre autre : « La Franço talamen tant centralisado s’estoufo d’egoucentrisme. Li principe de Mistral baiarien pleno vido au païs, aurié feni de s’estransina. Coumprendran-ti enfin à Paris que liogo de s’entestardi dins l’arcaïsme, uno vertadiero descentralisacioun, pèr pas dire uno vertadirero regiounalisacioun, sarié que prougrès e enançamen ? Lou Felibrige, despièi soun proumié jour, jamai decessè de n’en prouclama la necessita …
… Faire i lengo regiounalo la plaço que s’ameriton es lou coumbat felibren de tóuti li jour. Sabèn que leissa s’anequeli uno culturo, es leissa se degaia lou patrimòni e pamens es lou bèn dóu pople que s’apauris. Vai ensèn emé la regiounalisacioun que nous fau pas vèire s’esvali e qu’avèn, sènso lassige, de proumòure dins li piado de nòsti davancié. »

De vèspre, èi dins lou cinema de la vilo, un cop de mai clafi de mounde que li felibre veguèron d’abord un poulit filme realisa pèr lis enfant de l’escolo meiralo de Castihounés ; pièi lou filme « Las Sasons » realisa pèr Dono Pamela Varela ; après la proujeicioun la countarello-coumediano Mounico Burg respoundeguè bèn voulountié i questioun pausado sus lou filme pèr lis espetatour.

Finalamen lou Dimars 2 de jun un centenau de coungressisto partien en càrri pèr uno bello escourregudo fin de vesita lou païs de Duras : vesito de l’Oustau di vin que l’apelacioun « Côtes de Duras » es uno apelacioun d’ourigino countouroulado ; pièi vesito d’un establimen de coundiciounamen e de coumercialisacioun di pruno d’Agen. Après lou repas pres à l’ « Hostellerie des ducs », li felibre pousquèron vesita la viloto e subretout lou castèu di du ount’ uno guido tout ensèn forço saberudo e pleno d’imour encantè lou mounde.

Li felibre revenguèron pièi à Castihounés en s’arrestant un moumen pèr vesita la bastido d’Eymet.
A Castihounés lis adessias óuficiau emé de pichòti dicho pleno d’amista, se faguèron à l’entour d’un aperitiéu pourgi pèr la Coumuno e soun conse Pèire Sicaud.

http://www.occitanews.com

2 Re: Santa Estèla le Dim 6 Juin - 10:07

Sokolovic


Trobador !!
Trobador !!
Aquelo grafié fa mié-lengo.

Que pèno.

un sòci (membre assoucia )

fucking tautology

Voir le sujet précédent Voir le sujet suivant Revenir en haut  Message [Page 1 sur 1]

Permission de ce forum:
Vous ne pouvez pas répondre aux sujets dans ce forum