Frontièras internas a Occitània

Rebombissi sus çò que disiái sus las frontièras prepausadas per Lutz
per la (granda e gloriosa) confederacion d'occitània. Trucat de veire
los Loseròts meses amb los auvernhasses, e los aveironeses e los
orlhaguses amb los peiregòd dins una "Guiana" (que vòl dire
Aquitània...) fantasmatica prepausi de soscar sus aquela dolorosa
question. Es
possible (o non) de trencar Occitània en un cèrt nombre de grandas
regions (7 al melhor) per pas que degun se sentisca insolentat dins son
identitat?

Per començar un pichòt expausat: l'origina de las frontièras utilizadas
dins lo movement occitanista son de dos tipes, istoricas, e dialectalas.

Per las frontièras istoricas son sovent las de l'ancian regim, valent a dire las provincias d'abans 1789. Doncas aquò:



Coma vesètz, Lengadòc s'espandís plan al nòrd e a una part (pichòta)
non-occitana, Gasconha e Guiana son una sola e mema causa e Daufinat es
mitat occitana, mitat arpitana...


Mas s'utilizan tanben las frontièras dels 6 grands dialèctes que meritrian elas tanben d'èsser discutidas (ai notat en puntilhat d'unas zònas prolematicas):



Remarcatz que dialèctes e provincias an pas grands causas de veire dins la màger part dels cases. E de còps los dialectològs an utilizat las provincias per definir los dialèctes (l'exemple tipe es la frontièra lemosin/auvernhàs, que pas degun s'embestièt de traçar finament, se aquela frontièra existís: diguèron, en lemosin se parla lemosin, en Auvernha auvernhàs, fòra la zòna lengadociana...)

Las doas primièras prepausicions regularament trobadas serián doncas
-Una occitània a 7 provincias, facha en trencar Guiana de Gasconha (mas perqué se utilizam lo critèri istoric passar a un moment a un critèri linguistic? E sonque per aqueste cas?)

En gròs aquò:



Vesètz sul pic que i a de repotegar: d'exemple Avairon, virat cap a Tolosa e Montpelhièr se tròba dins una Guiana de plan mal definir.

-Una Occitània a 6 provincias basadas suls dialèctes: e doncas calriá dire a la gent d'Orlhac que son pas auvernhasses e trencar Peiregòrd, Provença etc...

Benlèu tanben que se calriá basar sus de critèris mai fins e veire al cas per cas sens doblidar la realitat departamentala. A lèu.

Shens jutjar lo ton tribalh (ne'n soi pas capable) ni saber gran causa de l'istòria tanpòc, que t'arremercii per aqueras lutz hèra utillas entà jo e d'autes, ce pensi.


Lo debat sus l'identitat o la cultura occitana tant per tant acabat, que ns'aviam de cap a la creacion de las regions. Be podem diser qu'avançam viste sus aqueste fòrum !

Gavach a écrit:(l'exemple tipe es la frontièra lemosin/auvernhàs, que pas degun s'embestièt de traçar finament, se aquela frontièra existís: diguèron, en lemosin se parla lemosin, en Auvernha auvernhàs, fòra la zòna lengadociana...)

Fai me excusa, mas quela frontiera linguistica es plan definida. En Cruesa, i a tres zonas dialectalas : marchesa, lemosina e auvernhata. La Corresa-Nauta es auvernhata maitot. Emai i a un bocinot de lengadocian en Lemosin, dau costat dau Chantau.

De legir : www.creuse.fr/IMG/pdf/16-Creusois-23.pdf

Disi pas que la frontièra existe pas, mas que sus la màger part de las mapas difusadas dins lo mitan occitanista la gent fan pas un gran esfòrç per traçar la frontièra lemosin/auvernhàs (una linha NS que seguís la frontièra provinciala). Es tanben lo problèma de la definicion dels 6 grands dialèctes...(qu'es aquò lo lemosin? lo lengadocian? etc...).

Gavach a écrit:Rebombissi sus çò que disiái sus las frontièras prepausadas per Lutz
per la (granda e gloriosa) confederacion d'occitània.

Bon, ja aquela carta sortís pas de mon imaginacion, la trapèri sus Eurominority, aquò me sembla, se me soveni plan. I aviá « Lengadòc Naut » en placa de Guiana. Lo PNO e sa polida carta que d'agrada utilisa la meteissa mena de carta, amb lo mot Guiena ( http://www.p-n-o.org/Occitania_federala.htm ), la carta linguistica pega mai o mens a n'aquò, amb sonque un gròs Lengadòc per Lengadòc+Guie/ana/Lengadòc Naut.

Es clar qu'es un petaçatga, lo mens marrit que possible. Sabi ben qu'es luènh d'èsser perfaita (soi pas una universitariá tanpauc… fau de visuals, es tot…), la tòca èra pas d'« insultar » lo monde, coma dises, mas de far una carta amb un descopatge mai o mens credible per la galejada. Ont es passat ton umor ? Sabi pas. Mas que que siá, garda ta condescendéncia.

Personalament las regions de la carta me van. De tot biais, qu'es per la galejada coma ditz Lutz. E me, sei per la region Guiena. Per mon papet basque trabalhava per Guyenne et Gascogne (oc-es, los subremerchats !! Eu pintava las publicitats). 'Laidonc, vole e la Guiena e la Gasconha !!!

Me pausèi suvent la questione Gavach ò sap, que n'avem platussat mantuns còps. Te merceje d'aver mandat sus quèu forum 'na mapa que mòstra qué qu'es Lengadòc, que l'aprenguèi a quela eschasença. Lo plaçave en segre l'espandiment dialectau.
I a de las nocions que circulan dins lo mitan occitaniste, qu'es 'rai. Mas las trape pas pro informativas. Las mapas que nos mostan ente qu'es Occitània son totjorn dau « a pauc prèp » quora om s'auvís pas respondre « vai-te'n legir quò que ne'n escriguèt un tau »
Ieu tamben ai enveja de far daus visuaus pròpes e precis. Ai enveja que nos puchèssem pesentar coma un país normau, que se sap ente comença e ente se chaba. Mielh, los Catalans te poden mostar d'animacions qu'esplican lor restachament a la corona daus Borbons, n'autres parlam dins lo vent e sèm pas fotuts de nos assumir coma paìs colonisat. Manca AnPrionsaBeag, que se plaça dins queu esperit amb sas video sus You Tube.
Las mapas que mostras son indicativas, solide, mas per aver 'na charra vertadiera a costat de la mendra mapa d'un Estat (dins un atlas per exemple), fan paure. Ai enveja de poder davalar au detal de la comuna, comencèi jà.

Si de non per representar tot los espandis, aimariá representar lo país en parçans pitits, per los 'massar segon las afinitats. Daus territòris de 2-3 cantons actuaus, un pauc de la mena de las comarcas catalanas. que compausarian de las regions ( que si son pas estadas entau davant 1789, las podem inventar au nòstre biais)Pense onestament que entre Bordèu e Montpellier ne'n fau una e m'agrada mielh de tornar surtir 'na Guiana que pas caucionar un « Midi-Pyrénées » qu'es un patchwork de despartaments.
Lo despartiment es tot drech surtit de l'administracion jacobina, ne'n vòle pas mai, a 1km prèp fasiá MXL23, quò a pas gaire de valor per me. Quora legisse lor noms trabucats per ne'n far n'apelacion occitan, quò me fai pensar au sindròme de Stockholm.

Bon, ja aquela carta sortís pas de mon
imaginacion, la trapèri sus Eurominority, aquò me sembla, se me soveni
plan. I aviá « Lengadòc Naut » en placa de Guiana. Lo PNO e sa polida
carta que d'agrada utilisa la meteissa mena de carta, amb lo mot Guiena
( http://www.p-n-o.org/Occitania_federala.htm ), la carta linguistica pega mai o mens a n'aquò, amb sonque un gròs Lengadòc per Lengadòc+Guie/ana/Lengadòc Naut.

Sabi ben qu'aquela carta sortís pas de ton imaginacion e coma as remarcat, lo subjècte pausa una question duberta a la quina ai pas de responsa tota facha. Pausi lo problèma, meti d'elements sus la taula e demandi a la gent se an d'idèas per arribar al decopatge melhor (o mens piéger..). Se ai pas respondut dins lo subjècte sus la CNO es que va al delà de ta mapa, concernís un fum de mapas que circulan dins lo movement occitanista.

Es clar qu'es un petaçatga, lo mens marrit que
possible. Sabi ben qu'es luènh d'èsser perfaita (soi pas una
universitariá tanpauc… fau de visuals, es tot…), la tòca èra pas d'«
insultar » lo monde, coma dises, mas de far una carta amb un descopatge
mai o mens credible per la galejada. Ont es passat ton umor ? Sabi pas.
Mas que que siá, garda ta condescendéncia.

Se pensas que pòdi vertadierament trobar polida la carta del PNO o que me soi sentit insolentat, me demandi ont es passat ton sens de l'umor...

Mielh, los Catalans te poden mostar d'animacions qu'esplican lor
restachament a la corona daus Borbons, n'autres parlam dins lo vent e
sèm pas fotuts de nos assumir coma paìs colonisat. Manca AnPrionsaBeag, que se plaça dins queu esperit amb sas video sus You Tube.

Per Occitània es pas çò mai complicat de far.

Si de non per representar tot los espandis, aimariá representar lo
país en parçans pitits, per los 'massar segon las afinitats. Daus
territòris de 2-3 cantons actuaus, un pauc de la mena de las comarcas
catalanas. que compausarian de las regions ( que si son pas estadas
entau davant 1789, las podem inventar au nòstre biais)

Una mapa que se sarra d'aquò es dins un vièlh HAR/FAR (facha pel Sumien). Es la mai interressenta a l'ora d'ara que coneissi, vau ensajar de la tornar trobar.

Pense onestament que entre Bordèu e Montpellier ne'n fau una e m'agrada
mielh de tornar surtir 'na Guiana que pas caucionar un
« Midi-Pyrénées » qu'es un patchwork de despartaments.

Guiana es un patchwork de l'administracion reiala, Miègjorn-Pirenèus de l'admnistracion republicana. E tròbi miègjorn-Pirenèas mai pròche de mon ressentit que non pas Guiana...

Nòta: http://oc.wikipedia.org/wiki/Par%C3%A7ans_d%27Occit%C3%A0nia la tièra dels parçans d'occitània, plan facha

Per contunhar sus la question dels departaments, una pichòta mapa per ajustar una pèça al copa-cap: ai ensajat, en me basar sus mon ressentit de representar l'indentificacion de la gent (o d'una part de la gent) departament per departament. De segur, es plan subjectiu.



Coma vesètz, lo problèma de Guiana apareis coma es: Guiana es lo forra-borra dels parçans que sabèm pas tròp ont metre vist que se sufison a elis-meteisses.
Vesèm que se dessenha de regions plan pauc problematicas: Lemosin, Lengadòc-bais, Provença e d'autras ont cal articular plan mai d'un nivèl d'identificacion (Cal trencar Arieja en dos? Qué ne pensan los ariejeses?)

Eth departament deths Pireneus-Atlantics qu'ei bicefale tanben. Eths Biarnes que'u partatjan dab eths Bascos. I ua part deths Occitans deth departament ne son pas biarnes : Gascons deth baish Ador.

Arf a écrit:Eth departament deths Pireneus-Atlantics qu'ei bicefale tanben. Eths Biarnes que'u partatjan dab eths Bascos. I ua part deths Occitans deth departament ne son pas biarnes : Gascons deth baish Ador.

+1

Gard tanben : Provençau devèrs Nimes e Lengadòc au ponent.

Arf a écrit:Eth departament deths Pireneus-Atlantics qu'ei bicefale tanben. Eths Biarnes que'u partatjan dab eths Bascos. I ua part deths Occitans deth departament ne son pas biarnes : Gascons deth baish Ador.

Jo tanben que m'ac pensi. desempuish qui costegi occitans de pertot, qu'èi tostemps trobat los bearnés mei intelligents.

fredoc a écrit:

Arf a écrit:Eth departament deths Pireneus-Atlantics qu'ei bicefale tanben. Eths Biarnes que'u partatjan dab eths Bascos. I ua part deths Occitans deth departament ne son pas biarnes : Gascons deth baish Ador.

Jo tanben que m'ac pensi. desempuish qui costegi occitans de pertot, qu'èi tostemps trobat los bearnés mei intelligents.

Es estranh, pr'amor los Occitans de pertot son d'acòrd ende díser lo contrari...

Fargar de frontièras sus de critèris lingüistics es un copa cap.
Ai pas jamai comprés ont s'arrestava Occitània sus la val de Ròse : a Tornon ? A Sant-Valièr ? E sus lo Pilat tanpauc : Saint-Genest-Malifaux i es o i es pas ?
A l'interior d'Occitània es encara mai fosc. Ai aprés l'occitan de Vivarés meridional, en cresant qu'era de Vivaro-aupenc... E fianalament, seria puslèu un lengadocian "en cha"... D'autres te lo foton amb l'auvernhat (tanplan aquelas cartas que meton Auvernha duscas a la broa de Ròse me fan plan rire). E la ciutat de Romans, es occitana o non ? Eca...
Tanplan caldria saupre s'avem vertadierament besonh de frontièras...

1/ Cresetz pas qu'abanç d'en arrivar aici cal fargar pais ?

2/ Soi lo sol que lo terme "frontieras internas" geina ?

1/ Cresetz pas qu'abanç d'en arrivar aici cal fargar pais ?

2/ Soi lo sol que lo terme "frontieras internas" geina ?

Car Joan Claude, cal plan veire que per fargar un país cal ben prepausar quicòm...E l'Occitània unida de Bordèu a Niça, desolat, i cresi pas. Doncas me sembla necite per bastir lo projècte d'occitània de discutir de qué prepausam al nivèl teritorial, en trencar amb lo modèl jacobin de decopatge d'aquel territòri, decopatge que pren plan pauc en compte lo sentit de la gent.

Doncas a mon pichon nivèl, ensaji de prepausar d'unes elements de soscadissa per tal d'arribar al modèl territorial que pègue mai a la realitat umana.

Gard tanben : Provençau devèrs Nimes e Lengadòc au ponent.

Question: los provençalistas revendican Gard coma una part de Provença?

Monsur Gavachier, pensi pas que me cal te brembar la diferencia mentre estat & Nacion.
Tant podi entendre las tuas paurs al nivel de l'unitat d'Occitania (quitament se las partatgi pas e que continui de diser que las divisions son mai cavadas pels occitanISTES qu'autra causa), tant compreni pas en que lo fach de diser "anem trencar lo pais atau e atau" nos desepara del jacobinisme, veire del bonapartisme, se me pos menar los teus lums sus aquel punt m'interessa (me podria benleu ajudar tanben de comprendre qu'una legitimitat tenem per anar diser a qualqu'un d'un parçan d'Occitania : non tu sias d'aici, que te sentis d'aila m'en foti, te disi que sias d'aici)

a perpaus de la carta dau Gavach, tot'en colors:
per lo Lemosin, ton "ressentit" es bon. En efiech, i'a gaire de region en França, pense, ente lo monde son tant "acquis" a l'edeia d'apartener a 'na region. Ansi, un tipe d'Ausança (frontiera auvernhata) se ditz tant lemosin qu'un tipe de Sent Junian (frontiera de la Charenta). L'identitat marchesa, per exemple, que concerna lo nord de Vinhana Nauta e la meitat nord de Creusa, a tendancia a completament despareisser... e pertant, 'la n'empaischava pas de se sentir Marches + Lemosin (qu'era lo cas chas me).
Per contra, i'a 'na granda diferencia que se fai totjorn sentir, chasque jorn (dins los raports umans, los eschamnhes eca), entre naut-lemosin e bas-lemosin...
podes traçar 'na linha orizontala que vai d'Ussel a Sent Irieis, en passar per Usercha. Aqui i'a 'na brava frontiera dins la testa dau monde entre nord e sud, naut e bas, e quo mena sovent d'alhors a un biais de concurencia intelectuala per se dire dau "Lemosin vertadier"... Pertant la chausa es simpla, e quo fuguet totjon entau, i'a dos Lemosins, un naut e un bas...
ps: i'a tanben l'edeia de Combralha, a l'est de Creusa, que contunha d'esistar dins la testa dau monde d'alai, mas quo lo empaischa pas de se dire Lemosin avant tot...

joan_cavalier a écrit: las divisions son mai cavadas pels occitanISTES qu'autra causa)

N'ac pensi pas. A noste en Bearn, eths occitanistas (o eths defensors der occitan, entaths qui pensan qu'occitanista ei un led mot) que son acusats ath contra de voler negar er'identitat bearnesa, o gascona, en un ensemble indiferenciat, pensat com artificiau. I si eras ideas bearnistas e troban un cert reclam ena populacion, qu'ei justament per'mor qu'aquesta demora per ua bona part estacata ar'identitat locau i a divisions territoriaus eiretatas der Ancian Regime. N'i a pas qu'a veder aci eth succes deths desodorants de veitura qui prenen era forma dera banera bearnesa.


,

joan_cavalier a écrit: tant compreni pas en que lo fach de diser "anem trencar lo pais atau e atau" nos desepara del jacobinisme,

Tota entitat territoriau de quauque endom qu'a besonh subdivisions administrativas. Era diferencia dab eth jacobinisme o eth bonapartisme, qu'ei qu'aqueste a volut divisar artificiaument eras identitats locaus enta controlar eth pais, mentre qu'era demarcha de Gavach enten preservar aqueras identitats.

joan_cavalier a écrit: me podria benleu ajudar tanben de comprendre qu'una legitimitat tenem per anar diser a qualqu'un d'un parçan d'Occitania : non tu sias d'aici, que te sentis d'aila m'en foti, te disi que sias d'aici)

N'em pas nosautes qui disem ar un o ar aude d'on a d'estar : eth monde que se n'encarcan hera plan tots solets : autanleu qui sorteishes de casa, eth monde que't demandan d'on es, que't volen situar. E ne't podes pas contendar de diser qu'es d'Occitania, d'Europa o deth monde... Que crederan que't trufas d'eths o qu'as quauquarren a esconer. Apres, quan me demandan de quin vilatge soi, arres ne m'empacha de diser que soi de Marselha. Mes bon...

Entende mielh amb la mapa tot'en color, ieu tamben. Coneisse qu'ai dau mau amb quel'afar de Guiana artificiala. M'i suèi estachat juscant' quí coma un qqr que permetia de contestar lo decopatge jacobin, e qu'es gaireben tot. Mercès Gavach per la lista daus parçan, auriá furguat un pauc mai la Wikipedia qu'auriá gut matiera a calcular, un pauc mai.

Me sembla d'aver pron suvent auvit 'na diferenciacion entre Coseran e lo demai dau despartiment d'Ariège per creire que pausaria pas de probleme de lo trenchar.
M'interessava per un temps de farjar 'na lista de tots los parçans maus talhats, las zònas de tauvera que seria mai coerent de restachar a l'entitat d'a costat. Auviguèi parlar dau cas de Nabinals (Lozère) que podria junhèr Roergue. Suèi segur per lo Confolentès e lo Nontronès que vese en Lemosin e pas en degun luèc mai. Per los autres sabe pas e aimariá ne'n aprenèr quí.

Si de non, prene quela platussada coma un eschamnhe de la mena 'massada de trabelh, se s'i parla de « frontiera », lo prene coma 'na paraula per entendre lèu quò que volèm dire, quò me truca pas. Dins lo cas de 'na comunicacion de vers un public mens au fiau (se jamai abotissiam…) fariá mèfi de parlar ren-mas de « delimitacions ».

Gavach a écrit:

1/ Cresetz pas qu'abanç d'en arrivar aici cal fargar pais ?

2/ Soi lo sol que lo terme "frontieras internas" geina ?

Car Joan Claude, cal plan veire que per fargar un país cal ben prepausar quicòm...E l'Occitània unida de Bordèu a Niça, desolat, i cresi pas. Doncas me sembla necite per bastir lo projècte d'occitània de discutir de qué prepausam al nivèl teritorial, en trencar amb lo modèl jacobin de decopatge d'aquel territòri, decopatge que pren plan pauc en compte lo sentit de la gent.

Doncas a mon pichon nivèl, ensaji de prepausar d'unes elements de soscadissa per tal d'arribar al modèl territorial que pègue mai a la realitat umana.

Es un pauc aqui d'enfifragi de moscas, per la simpla e bòna rason qu'estei... "pais" restaràn totjorn francés

Gavach a écrit:

Gard tanben : Provençau devèrs Nimes e Lengadòc au ponent.

Question: los provençalistas revendican Gard coma una part de Provença?

Voei, mai es un pauc sa Palestina, bòrd que leis occitanistas li tuan lo provençau

Gavach a écrit:Vesèm que se dessenha de regions plan pauc problematicas: Lemosin, Lengadòc-bais, Provença e d'autras ont cal articular plan mai d'un nivèl d'identificacion (Cal trencar Arieja en dos? Qué ne pensan los ariejeses?)

Dins li Aups-Maritimi li a tres identitats: la nissarda, la provençala, e l'aupenca. Caurria ja decopar lo departament en doi au nivèu dau flume Var: la partida oèst aneria a la Provença e la partida èst formeria lo Comtat de Nissa. Per li Aups, non sabi exactament don s'arrèston li limitas lenguistiqui: pensi que li valadas d'Esteron son puslèu provençali, aqueli de Palhon, Vesubia e de la Roya son nissardi e finda aqueli de Tinea e dau Mercantor son aupenqui.

Se partem dens aquèra dralha, en Gironda, i a

• 4 fòrmas de gascon (basadés (Basats, Lengon, St Sefrian), medoquin, bordalés (dens l'agglomeracion bordalesa, e benlèu dinc a Podensàc, èi pas enqüèra trobat), lanés (Hostens, Belin) e gascon maritim deu costat deu País de Buch (Arcaishon, La Testa, Biscaròssa)
  
• 1 de lengadocian dens l'Entre-Duas-Mar e sus la riba drèita de Dordonha (pròcha deu parlar de Brageirac me sembla (Sauveterra de Guiena, Castilhon-la-Desfacha)
  
• 1 fòrma de limosin dens la partida est deu canton de Cotràs (Puynormand)
  
• 2 fòrmas de peitavin-santongés (nòrd deu despartament e canton de Montsegur).
  

En mèi d'aquò, a la Revolucion, la demanda estó hèita de dus despartaments pr'amor deus vielhs avescats :

• Au nòrd, la Gironda
  
• Au sud, lo Basadés
  

Per acabar, i a quauques identitats locaus, com las AOC deu vin (soi deu Sauternés, soi de las Gravas, soi de l'Entre Duas Mars, deu Medòc,...), lo Captalat de Buch avó una identitat, i a tanben la termièra vinha/pinhadar...

Donc bon, podem trencar tots los territoris, mes au nivèu locau vesi pas tròp l'interés... Qu'Occitània sia trencada en 6 o 7 país, perque pas.

Car Jerôme Culotin, la responsa d'Arf es la que te voliái far mas mai polida.

Es un pauc aqui d'enfifragi de moscas, per la simpla e bòna rason qu'estei... "pais" restaràn totjorn francés

Òc e completament assumit, mas coma sèm encara liure de parlar vesi pas çò que nos en empachariá...

Dins li Aups-Maritimi li a tres
identitats: la nissarda, la provençala, e l'aupenca. Caurria ja decopar
lo departament en doi au nivèu dau flume Var: la partida oèst aneria a
la Provença e la partida èst formeria lo Comtat de Nissa. Per li Aups,
non sabi exactament don s'arrèston li limitas lenguistiqui: pensi que
li valadas d'Esteron son puslèu provençali, aqueli de Palhon, Vesubia e
de la Roya son nissardi e finda aqueli de Tinea e dau Mercantor son
aupenqui.

Lo problèma aquí es pas un problèma de limit linguistic, es un problèma de sentiment e de practica ( ont vau al supermercat? ont mandi los dròlles al licèu? ont me sentissi a cò de ieu?). Organizar un país en se basar pas que sus d'isoglòsses es un pauc neci (sens negar que a d'unes endreches pòt aver son importéncia).

Auviguèi parlar dau cas de Nabinals (Lozère) que podria junhèr Roergue.

Qué? As tròp begut amb d'imperialistas roerguasses enrabiats que lo Malhe-Biau siá en Losera e non pas en Avairon. Aubrac es pas un país a la basa, es una estiva despartida entre Auvernha, Gavaudan e Roergue. (i a pas DEGUN sus Aubrac).

Gavach a écrit:

Es un pauc aqui d'enfifragi de moscas, per la simpla e bòna rason qu'estei... "pais" restaràn totjorn francés

Òc e completament assumit, mas coma sèm encara liure de parlar vesi pas çò que nos en empachariá...

Efectivament, pas de oai

fredoc a écrit:Lo debat sus l'identitat o la cultura occitana tant per tant acabat, que ns'aviam de cap a la creacion de las regions. Be podem diser qu'avançam viste sus aqueste fòrum !

La question dels limits territorials es ligada a la question de l'identitat.
Si que non ieu m'agrada plan la darrèra carta del gavach amb una modificacion que seriá lo restacament de Roèrgue al Lengadoc e aqui fau intervenir un critèri geografic e climatic, per ieu aquí ont s'arrèsta lo vent d'autan (de la mar nòstra) s'arrèsta lo Lengadoc e coma o ditz lo gavach los roèrgasses son virats cap a Tolosa e Montpelhièr, coma Carcassona cap a Tolosa. Donc REUNIFICACION DEL LENGADOC ! sus aquelas basas. Aquò vòl dire tanben REUNIFICACION DE LA GASCONHA amb una presa en compte de totes aqueles critèris culturals , istorics mas tanben geografics e economics.
Aital podrèm desliurar nòstres amics bascas per l'euskal-batera 'despartament e catalans amb una regió catalana (lo critèri de l'espaci deuriá pas jogar, a l'ora d'ara los despartaments an ben quasi tan de poder coma las regions) amai dins l'európa de deman las euro regions seran de prendre en compte.

Lafontan a écrit:Donc REUNIFICACION DEL LENGADOC ! sus aquelas basas. Aquò vòl dire tanben REUNIFICACION DE LA GASCONHA amb una presa en compte de totes aqueles critèris culturals , istorics mas tanben geografics e economics.

LA-FON-TAN, PRE-SI-DENT ! LA-FON-TAN, PRE-SI-DENT !

Compreni pas tròp. "Reunificacion de la Gasconha" es a diser har una region Gasconha e non pas d'un costat l'Aquitània, de l'aute Mieidia-Pireneus ?

Gavach a écrit:Lo problèma aquí es pas un problèma de limit linguistic, es un problèma de sentiment e de practica ( ont vau al supermercat? ont mandi los dròlles al licèu? ont me sentissi a cò de ieu?). Organizar un país en se basar pas que sus d'isoglòsses es un pauc neci (sens negar que a d'unes endreches pòt aver son importéncia).

Un problèma de sentiment? Alora ti pò dire la mema caua: à l'oèst dau flume Var, si sènton provençaus, à l'èst - nissarts.