Lo Milhàs, sei segur que la mjoritat dau monde sus queu forum coneissen, quo es una recepta plan occitana. Io la vese mai que mai dau costat daus Pireneus, çò que explica que io sabe pas far entau. Per contra, chas nos, mai au Nòrd (ai vist que quò existava en Charenta francesa, e en Torena tanben), n'avem una adaptacion, o una evolucion (sabe pas tròp dins quau òrdre las chausas se fagueren).

Gardem la basa, quo es a dire lo "milhàs", la farina de gròs blat/blat rotge/blat d'Espanha/bigarroelh/milh/milhòc mas i ajustem de la coja/coia/citrolha. I a quitament daus còps que, quand avem pas mai de farina de gròs blat, botem de la de blat normau. Mas contunhem de 'pelar quò milhasson (Ai vist "milla" en Charenta"). I a quitament daus endrechs ente quo a pas mai de rapòrt (en Corrèsa, quo es una mena de tortiera de patatas, e dedins i a pas de farina de gròs blat, nimai de coia...).

Veiqui ma recepta a io, coma se fai en Peiregòrd :

Far cueire un kilò de coia pelada e copada dins de l'aiga (o dau lach, per un gasteu sucrat) emb de la sau.
Esgotar, espotinhar, boirar emb 250 gramas de farina (de bigarroelh, donc, se podetz, quo es pas aisat de trapar), 250 gramas de sucre (mas lo darrier còp que l'ai fach l'ai trobat tròp sucrat a 250 gramas, alara mefi), 3 uòus e un sacheton de sucre vanilhat.
Plan boirar lo tot (au mixer quitament se voletz, per far 'na pasta plan omogena), e lo botar dins un plat burrat e farinat, pendent tres quarts d'ora a forn chaud (verificar a la puncha dau costeu). Podetz enventualament ajustar de las fruchas sechas (n'autres botem daus pruneus, o dau rasims), mas vos conselhe alara de mens botar de sucre.

Lo milhasson pòt tanben se far salat, emb daus lardons, salat-sucrat (lardons e pruneus), se minjar chaud, freg, tebi, coma voletz.

E chas v'autres, coma se fai ?

Jo que hèi lo milhàs sucrat. Malurosament que'u hèi sustot dab haria de hroment, de mei bon trobar que non pas dab la haria de milhòc de la quau e tien lo son nom.
Lo men secret qu'ei dens lo còser.
Lo resultat finau que deu semblar a un flan. Lo devath que deu estar consistent e lo dessus drin moth.
Los ingredients:

-sucre, 250g
-haria, 150g
-lèit, 1l
-ueus, 4 o 5
-ròm tau gost.

Qu'ac cau tot mesclar e har còser a huec baish (haut o baish termostat 3 segon lo horn) e longtemps (1h tostemps segon lo horn). Que'u cau har en un plat redon e susvelhar que lo dessus ne sia pas tròp cueit. Que'u cau arrestar tanlèu qui lo dessus n'ei pas mei liquide.

Chut aquesta recepta qu'ei un secret de la mair bona!