Prumier ipermerchat labelisat occitan

Citation:

Adiu,

Divendres 3 de julhet a 11oras, lo Auchan de Periguers/ Marsac serà lo primièr ipermercat labellizat “Oc per l’occitan’’.

Reçauprà oficialament,
coma los 3 autres labellizatz de Dordonha (Gîte de Barrière (Velinas),
Ferme de la Faye (Brantòsme), Les dames du Maine (Bordelha)) , sa certificacion de nivèl 2 en presencia dels elegits e de la premsa.

Lo certificat de nivèl 2, “Aicí parlam occitan’’ significa que “se la lenga se fa veire sus un o mai d’un supòrt escrich, sètz tanben asseguratz de trobar al mens una persona per vos servir en occitan.’’

Creat en 2007, aquel label a per tòca de valorar los actors de la vida economica qu’emplegan la lenga occitana dins lor activitat. Per cadun, bòta tanben en avant la possibilitat de s’exprimir en occitan, de reclamar un servici en occitan, o tot simplament de far un primièr apròchi cap a la cultura occitana.

Mai de 130 entrepresas e associacions an ja aquesit lo labèl, pròba d’un desir de metre en avant lor afeccion per la lenga e la cultura occitana. Cada sector d’activitat pòt recebre lo labèl òc per l’Occitan.

Tota l’actualitat del label se trapa aquí : www.occitan-oc.org.

Al plaser de vos veire lo divendres 3 de julhet al dintre del Auchan de Periguers/Marsac (24) a 11 oras.

Valentin Belhomme

Senhale tanben, perque io sei dau canton, que queu centre comerciau es lo segond en talha dins l'aglomeracion de Peireguers... çò que farà una bona visibilitat a tots los rejons jos-titolats en occitan...

Bon, n'i a que van díser que's ua vergonha qu'un ipermarcat profita de la lenga. Perque pas. Mes a un moment, se cau demandar se volen la lenga dens la vita vitanta o non.

_________________
Tant d'annadas aviái somiat
Al mòble en kit crompat a But !
Mas en lo montant l'ai petat !
Ai, Cocut !

Pau DELERMÀS-FIGORNIÈR

Per un còp, vau pas har lo cagant. Soi pas un fan deu sistèma d'ipermercats, mes podem pas díser que "profieitan" de la lenga.

N'an francament pas arren a ganhar dens aquera istuèra, pas degun va viéner per'mor i a ua senhaletica bilingua, manca los d'aqueth forum !

Au contra, qu'ajuda, com l'as dit, a la socializacion de la lenga.

Doncas, òsca !

(e ben, fa fòrça caud !!)

_________________
// ❦ ± vertadièra cagaira ❦ redactritz de mòda en occitan ❦ // ☀ blòg ☀ // ★ Occitània Leopard Crew ★ //

Coma diguèi en -quauqu'un luèc mai, un supermerchat qu'es pas l'endrech que l'i espere la lenga d'enprumièr mas se l'i es tant melhor. Au contra m'agradaria de l'auvir emplejada mai suvent au dediens daus quite mitan que la defend, e son pas las eschasenças de s'esmaronhar que mancan.

_________________
Los Occitans son tant valents que son los sols d'aver obtengut un premi Nobel amb de las dechas d'ortografe.

Citation:

lo Auchan de Perigüers/Marsac foguet plan labellisat divendres 3 de julhet.
La sinhaletica en oc es d'en pertot. De crotz son vesibles dins tot lo Auchan coma lo visuau "l'occitan nos agrada".

Una part del personal es tanben capable de vos respondre en occitan. E una formacion a la lenga va segurament se far per l’ensem del personal que ne farà la demanda.

Podem legir per exemple : "benvenguda", "merces e a lèu", Accuelh", "seguretat", "chabatz d’entrar",

E lo melhor, l'eslogan "vivam mielhs, vivam mens char".

Aquela sinhaletica demorarà tot lo temps dins lo Auchan. Qualques produches regionaus en particular son marcats en oc "Pastís de Perigòrd emb botareus"...
Lo personal pòrta tanben, per l’estiu al mens, lo logò en rotge e jaune :"Auchan, 1^er hyper label Oc"

Valentin Belhomme

Io de tot aquò retene plan segur l'afichatge bilingue durable,e mai que mai, l'ideia de perpausar una formacion au personau que lo vòu.

Vau parlar d'un istòria personala (per un còp). Io avia un grand-oncle que vivia dins lo mesme vilatge que io, 'quò vòu dire que coma 90-100% daus vielhs, parlava occitan, benleu mai que lo frances. Las 10 darrieras annadas de sa vita, quitet lo vilatge per s'instalar en vila, a Peireguers, pas tròp luenh justament de quel ipermerchat novelament labelisat. Lo coneissent, devia pas aver tròp vergonha de parlar en patois a la caissiera se vesia qu'ela comprenia. Mas quant ausen lo far, de quilhs vielhs per los quaus la pita discussion a la caissa de Auchan es benleu lo sol rapòrt uman qu'auràn de la setmana ?
Enfin, tot aquò per dire que daus vielhs coma mon grand-oncle, qu'an quitat lo vilatge per anar a la "zòna", n'i a tot plen dins lo canton de Marsac. Lur perpausar de far lurs chaptadis en occitan, quo es tot un varrolh sociau que sauta.