Ai enfin pògut veire lo film "Las Sasons" a l'Estivada.

Per los que coneissen pas, fuguet fach a la seguida dau grand colectate fach sus la Dordonha per Monica Burg e lo Conselh Generau. Un colectatge doblat d'una volontat artistica, puei que l'an declinat en expausicion de fòtos (los retrachs daus vielhs enregistrats), en peça de teatre (Imagenaire, emb Guilhèm Lopez e Bernat Cauhapé)...

A balhat l'ideia a una realisatriça Francò-Chilena, Pamela Varéla, de farjar un film en se servir un pauc de queu materiau.
Es centrat sus la plaça de la femna en Peiregòrd (tots los personatges son femenins, l'òme es sia inutile, sia mòrt, sia ausent), e tot lo long dau film vesem de las femnas, de tot atge (ai doas ancianas amijas dau liceu que juguen dedins) se contar de las istòrias de la vita, de las istòrias pebradas, viure que.

Quauques uns pòden trobar 'quò chiant, e sei segur que zo trobarán, mas per io lo film es una meravilha, esteticament (plans sus la campanha peiregòrda que chamnha segon las sasons, banda-son minimalista mas en occitan blos...) e respecta plan çò qu'es per io lo ròtle dau cinema : provocar l'emocion (mencion especiala a la scena finala de l'esnosatge, vertadier liam entre las femnas).
Conselhe a tot lo monde de lo veire, se lo trobatz, en mai un film professionau completament dins la lenga es una chausa rara.

D'acòrdi del tot amb lo Danís ! Mas kand meme, de còps k i a se fa longuet.
La relacion entre las femnas entrevistadas e la MOnica Burg es plena de tendresa , de respièch... Un polit trabalh sus la lutz. E macarel, Peiregòrd es un plan polit país ( mas akò o sabiái ja)